1. Itlea mhonnosor, Boaz darvonttea sorxem vochon boslolo; tedna tannem khobor kel'li to soiro ailo. Boazan taka mhollem, 'Mhojea ixtta, hangasor ie ani bos;' to ailo ani boslo.
2. Boazan tedna xarachea dha zannteank ghetle ani tankam mhollem, 'Hanga bosat,' ani te bosle.
3. Tedna suttka diuncho hok'k aslo tea mon'xak Boazan mhollem, 'Moabachea Mollancher thaun porot ailea ti Naomi, Elimelek amchea bhavachê zominicho kuddko aslo to vikunk sôdta.
4. Hem tuka hanvem sangchem mhonn mhaka dislem, "Hangasor boson aslolea mon'xam fuddean ani mhojê porjechea zannteam mukhar to kuddko tum tuzo korun ghe. Suttka diuncho tuzo hok'k vaprunk tuji khuxi zalear, suttka di; tuka tôr khuxi na, hem mhaka kollun ieunk mhaka sang, kiteak tujê bhair suttka diupi hanv ekloch asam, ani tujê uprant mhaka odhikar asa." ' Tea mon'xan mhollem, 'Suttka diunk mhaka khuxi asa.'
5. Tedna Boazan mhollem, 'Jea disa Naomichi zomin tum ghetai, teach disa, mel'leachem nanv tachea daizant sasvôt urchê khatir, Moabachi vidva Ruth, tuji potin zatoli.'
6. Tedna suttka diunk hok'k aslolea mon'xan mhollem, 'Mhojean suttka diunk zaina. Oxem kelear mhojea daizak mar bostolo. Mhojean suttka diunk zaina mhonnttôch, mhozo hok'k vaprun tum suttka di.'
7. Tôr adlea kallar, Israel somazan toxi chal asli. Jedna konnui zomin soddoitalo vô zomnicho adôl-bodôl kortalo, tedna ho vevhar thir korunk monis aplea paianchi vhann kaddun dusreak ditalo. Oxem Israelant koblat anuman'tale.
8. Mhonnttôch suttka diuncho hok'k aslolea mon'xan Boazak mhollem, 'Tunch tem tujem kôr.' Tedna tannem apli vhann kaddli.
9. Tedna Boazan zannteank ani thoim aslolea sogllea lokak mhollem, 'Elimelekachem aslem titlem-i, toxench jem Mahlon ani Khilionachem aslem titlem-i Naomichea hatantlem hanvem mhojem korun ghetlam mhonn tumi aiz govai.
10. Toxench mel'lea mon'xachem nanv tachea daizant sasvôt korcheak ani mel'lea mon'xachem nanv tachea bhavam modem ani tachea nograchea darvonttear poro poddona zaunk, Moabachea Ruthak, Mahlonachê vidvek, mhoji potin zaunk hanv zoddun ghetam. Hache tumi aiz govai.'
11. Darvonttea sorxem aslolea sogllea lokan ani zanntteamnim mhollem, 'Ami govai.' Rakelan ani Leahan borabor Israelachem Ghorannem bandlem, tanchê sarki Sorvespor tujea ghorabeant bhitôr sortolê striek korum. Efratant bollixt zaiat, Bethlehemant nanvostik zaiat.
12. Ani Sorvespor hê toren striechim tuka ditolo tea bhurgeam vorvim tujem kuttumb Tamaran Judah udexim zolm dilolea Perezachea ghorannea sarkem zaum.'
13. Uprant Boaz Rutha kodde logn zalo ani tika apli potin korun ghetli. Ani tim ektthaim zatôch, Sorvesporan tika gorbest zai-xi keli, ani tinnem eka bhurgeak zolm dilo.
14. Bailamnim Naomik mhollem, 'Sorvesporak argam! Kiteak Tannem mel'leak apnnachê svater aplem nanv Israelant samballunk aichea disa lagxilea soirea virêt dovrunk na.
15. Ho bhurgo tujea jivak ghottai ditolo ani tujê utar piraier tuzo adar zatolo, kiteak tuzo môg korta ani tuka sat putam poros odik vorti zaun asa tê tujê sunek to zolmola.'
16. Ani Naomin bhurgeak aplê unttient ghetlo ani, aploch put koso taka dhôrun, ti tacho poramôs korunk lagli.
17. Ani sezarchea bailamnim taka ek nanv ghalem. Tãnnim mhollem, 'Naomik êk put zolmolo.' Ani Obed mhonn taka nanv dovorlem. To Jessecho bapui, ani ho Davidacho bapui.
18. Hi Perezachi sonsôt: Perez Hezronacho bapui.
19. Hezron Ramacho bapui. Ram Amminadabacho bapui.
20. Amminadab Nashonacho bapui. Nashon Solomonacho bapui.
21. Solomon Boazacho bapui. Boaz Obedacho bapui,
22. Obed Jessecho bapui ani Jesse Davidacho bapui.
