1. Fuddareanchea disamnim desant dukôll poddlo ani Judachea Bethlehemacho, konn-eklo monis, aplê bailek ani dogam putank gheun, Moabanchea desant biradd korunk gelo.
2. Dadleachem nanv Elimelek, tachê bailechem nanv Naomi ani tachea dogam putanchim nanvam Mahlon ani Khilion; tim Judachea Bethlehemachim Efraimachê kullientlim. Moabachea Mollancher vochun, tãnnim thoim thikann kelem.
3. Thoim Elimelek, Naomicho ghorkar melo ani ti aplea dogam putank gheun urli.
4. He Moabit cheddvam kodde logn zale: ekleachem nanv Orpa ani dusreachem nanv Ruth. Tim sumar dha vorsam thoim ravlim.
5. Magir Naomiche put, Mahlon ani Khilion, dog-ui mele, ani Naomi, aple dog put ani ghôv nastana urli.
6. Tea uprant tinnem aplea sunank gheun Moabachea desantli bhair sorunk chintlem, kiteak Sorvesporan Aplê porjek bhett diun tika jevonn-khann dita mhonn tinnem aikol'lem.
7. Oxem aplea sunam sangatim, apunn ravtali to ganv tinnem sôddlo ani porot Judachea desant vochpachi vatt tãnnim dhôrli.
8. Naomin aplea dogam sunank mhollem, 'Cholat porot, zonnekli ap-aplê avoichea ghora. Zoxem morun geleat tanchê sovem ani mhojê-i sovem tumi visvaxi môg dakhoila, têch porim Sorvespor tumchê sovem dakhoum.
9. Sorvespor tumkam, zonna-eklek, tumchea ghorkarachea ghorant visôv mello-so korum.' Tedna tinnem tancho umo ghetlo, punn tãnnim aplo tallo ubarun roddunk suru kelem.
10. Tãnnim tika mhollem, 'Na, tujea loka-xim ravunk tujê borabor ami ietoleanv.'
11. Dhuvam-nô, ghora vochat' Naomin mhollem. 'Mhojê borabor kiteak mhonn tumi ietat? Tumche ghov zaunk mhojea kusveant anink put asat kitem?
12. Ghora cholat, dhuvamnô, vochat, kiteak utar piraiek pavun mhojean anink logn zaunk zaina. "Mhaka ozun bhorvanso asa: Aichêch rati hanv êk ghov ghetolim ani anink putank zolma haddtolim" oxem pasun hanvem mhollolem zalear,
13. te vaddun vhodd zai porian tankam ravunk tumi toiar asat? Tanchê pasot tumi logn zainastana ravxat? Na, mhojea dhuvamnô, Sorvesporan Aplo hat mhojê add ubarlo ailo dekhun, tumchê pasot mhaka vhôdd khont bhogta.'
14. Tãnnim aplo tallo ubarun novean roddunk suru kelem. Uprant Orpa aplê sasumaincho umanv gheun aplea ghorcheam-xim portoli. Punn Ruth tika chikttun ravli.
15. Naomin tika mhollem, 'Polle, tujizav aplea ghorcheam-xim ani aplea devam-xim portoli; tichê bhaxen tum-i voch.'
16. Punn Ruthan mhollem, 'Tuka sôddunk ani tujê pattlean iena zaunk, mhaka boll korum naka, kiteak tum vetai thoim hanv vetolim, tum ravtai thoim hanv ravtolim, tuji porza mhoji porza zatoli ani tuzo Dev zatolo mhozo Dev.
17. Zoim tum morxi, thoim hanv mortolim ani thoim mhaka purtolim. Moronn bhairaun, anink koslem-i karonn mhaka tujê sorxili doxim korit tôr, sangunk zainant tosleô ani odik noxtteô pidda, Sorvespor mhojer dhaddum!'
18. Apli patt sôddunk Ruth toiar na tem polleun, Naomin anink zap keli na.
19. Teô dog-ui Bethlehem pavo-sor cholot ravleô. Teô Bethlehemant pavleô tedna ak'khea xarant tanchi khobor gazli ani bailamnim mhollem, 'Hi Naomi bi?'
20. Hem aikun tinnem zobab dilo, 'Mhaka Naomi mhonnum nakat, mhaka Marac mhonnat kiteak Sorvpodvedaran mhojem jivit koddu kelam.
21. Hanv bhorlolea hatamnim mhojem ghor sôddun gel'lim ani Sorvesporan mhaka ritea hatamnim mhojea ghora portun haddlea. Tôr jedna Sorvesporan Apunn mhojer add mhonn dakhoilam ani Sorvpodvedaran mhaka khast lailea, tedna mhaka Naomi mhonn anink kiteak ulo marcho?'
22. Oxem Naomi aplê Moabit sunê Rutha borabor Moabitanchea desantli porti aili. Tim Bethlehemak pavlim tedna zovarachê pikacho kall suru zal'lo.
