1. Naomik ghovachê vatten êk soiro aslo, bhov girest ani Elimelekacheach ghoranneantlo. Tachem nanv Boaz.
2. Moabit Ruthan Naomik mhollem, 'Mhaka borê bhaxen gheit tea mon'xa pattlean konnxiô punzaunk mhaka xetant vochum-di.' Tinnem tika zobab dilo, 'Voch, mhojê dhuvê.'
3. Ti geli ani xetant vochun lunvpiam pattlean konnxiô punzaunk lagli. Tichea noxiban to xetacho kuddko Elimelekachea ghoranneantlea Boazacho aslo.
4. Boaz tednanch Bethlehem nograntlo ailo. Tannem lunvpiank mhollem, 'Sorvespor tumchê sovem asum.' 'Sorvespor tumcher axirvad ghalum' oso tãnnim zobab dilo.
5. Lunvpeancher odhikar aslolea aplea sevokak Boazan mhollem, 'Hi tornnatti ostori konnachi?'
6. Ani lunvpeancher odhikar aslolea sevokan zobab dilo, 'Moabachea desant thaun Naomi borabor porot ail'li Moabit ostori ti.
7. Tinnem mhollem, "Upkar korun mhaka hangasor punzaum-di ani jem kitem lunvpeanchea pattlean bhoreantlem poddta tem mhaka ektthãi korum-di." Oxem ti aili ani sokall tem atam porian, kosloch visôv nastana hanga ti ravli.'
8. Boazan Ruthak mhollem, 'Mhojê dhuvê, aik ani sangtam tem somzun ghe. Hea xeta bhair dusrê kodden anink konnxiô punzai-naka, na mhonn hangasorli koddsoronaka, mhojea kameriam borabor rav.
9. Tim lunvtat tea xetachea kuddkeacher dollo dovor ani tanchê pattlean voch; tujê vattek vochona zaunk hanvem mhojea chakrank adnia ghalea. Tuka tan laglear, chakramnim udok kaddun bhôrlolea aidonantlem pie.'
10. Tedna zomnir sorpôtt poddun Ruthan Boazak mhollem, 'Hanv porki astana tunvem mhojer nodor ghalunk, hem bhag mhaka khoinchem?'
11. Boazan zobab dilo, 'Tuzo ghôv mortôch tujê sasumaiê lagim tum koxi vagli tachi mhaka soglli khobor asa; tujea bapaik, tujê avoik ani khaxa tuzo zolma-dês soddun, tunvem adim kednanch vollkhunk na tea loka modem tum jieunk aili, tem-i hanv zannam.
12. Jem tunvem kitem kelãi tachê khatir Sorvespor tuka farik korum ani Zachea pakotteam khal asro sôdunk tum aileai, To Sorvespor Israelacho Dev tuka subham' mozuri dium.'
13. Tinnem mhollem, 'Mhojea dhonia, tujea dolleam mukhar hanv manovloli zaum; tujea kamereantlê eklê sarki hanv nhoi, torui tunvem dhir-boll ditolim utram uloun, tujê chakornik ghottai dili.'
14. Jevnnacho vêll zalo tedna, Boazan tika mhollem, 'Ie ani hantlo unddo kha ani tuzo kuddko xirkeant buddoi.' Lunvpeam sangatim Ruth bosli ani Boazan tika bazlolea zovacho êk vantto dilo; ti pott bhôr jevli ani tichem thoddem jevonn urlem.
15. Konnsam ektthaim korunk ti uttli tedna, Boazan aplea vavraddeank hukum' ghalo, 'Bhoream modem porian tika konnsam ektthaim korunk diat. Tika sotainakat.
16. Ani bhoreantlim thoddim konnsam mud'dom bhair kaddunk ani tim khala uddounk chotrai dhôrat. Tika tim ektthaim korunk diat ani tika tapoun kaddi nakat.'
17. Mhonnttôch sanz porian tinnem xetant konn'sam ektthaimlim. Uprant, apnnem ektthaim kel'lim konnsam moll'lim ani zovachi sumar êk paili zali.
18. Apnna borabor tem gheun, ti nogrant porot geli. Tinnem punzail'lem tem tichê sasumain pollelem. Apnnak zai titlem khelea uprant, apnnem dovorlolem tem-i Ruthan kaddlem ani tem tika dilem.
19. Tichê sasumain mhollem 'Tunvem aiz khoinsor konn'sam punzailim-i? Khoinchê suater tunvem kam' kelem-i? Tujê sovem udar zal'lea mon'xacher Sorvespor aplo axirvad ghalum.' Konnachea xetant kam kortali tem Ruthan aplê sasumaink sanglem, 'Aiz hanv kam kortalim tea mon'xachem nanv Boaz.'
20. Naomin aplê sunek mhollem, 'Zo jiveank toso mel'leank aplea visvaxi moga thaun pois kaddina to Sorvespor tacher axirvad ghalum.' Aninkui Naomin mhollem, 'Ho monis amcho soiro. Amkam suttka diunk zankam hok'k asa tanchê modlo ho eklo.'
21. Moabachea Ruthan aplê sasumaink mhollem, 'Tannem aninkui mhollem, "Mhojea sogllea pikacho vavr sompo porian, tum mhojea vavraddiam sangatim rav." '
22. Naomin Ruthak aplê sunek mhollem, 'Dhuvê, khoincheai dusrea xetant vechê bodlek hea mon'xachea kameriam borabor gelear tuka odik borem, dusrea xetant tuka konn-ui vaitt korit.'
23. Mhonnttôch zovachi toxich gonvanchi lunvnni sompo porian ti Boazachea kameriam pattlean konnxeô punzait asli. Ani aplê sasumãi borabor ti ravli.
