1. Tedna Naomin, tichê sasumain mhollem, 'Mhojê dhuvê, tuzo fuddar sukhest zal'lo polleunk mhozo kaido nhoi?
2. Ani zachea kameriam borabor tum asli, to Boaz amcho soiro nhoi? Polle to aichê rati foddar zov asuddtolo.
3. Mhonnttôch nhãvun pormôll ghal, bore kopdde nhesun mollnnechea foddar voch! To monis kha ani pie-i porian tum konn ti taka vollkhunk dinaka.
4. Punn to nhidunk veta tedna, to khoim nhidta tem chotraien polle, magir voch ani tachea paiam-xim panghurchem voir kadd ani thoim tum add podd. Kitem korunk zaitem to tuka sangtolo.'
5. Ruthan mhollem, 'Tum sangtai titlem-i hanv kortolim.'
6. Mhonnttôch ti foddar geli ani aplê sasumain sanglolem titlem-i tinnem kelem.
7. Khelea-pielea uprant, Boaz khuxal zalo ani zovachê raxi kuxik add poddlo. Tedna Ruth lipchoriam geli ani tachea paiam sorxim pangurchem portilem ani add poddli.
8. Modianir to sott korun zago zalo ani portolo. Ani polle zalear thoim tachea paiam-xim add poddloli êk ostori asli.
9. Tum konn?' tannem mhollem ani tinnem zobab dilo, 'Hanv tuji chakorn Ruth. Tujem avoronn mhojer pattlai, kiteak mhaka suttka diunk tuka mhojer hok'k asa.'
10. Dhuvê, Sorvespor tujer axirvad ghalum' tannem mhollem. 'Tôr hi tujea visvaxi mogachi kornni poilê-von odik vhôdd, kiteak tum dublleam vô girest tornneam dadleam pattlean dhanvunk na.
11. Punn atam mhojê dhuvê, bhienaka, tum magtai titlem-i hanv kortolom; tôr mhojea xarantlo sogllo lôk tum sugunni ostori mhonn zanno.
12. Punn, zorui tuka suttka diunk hok'k mhaka asa hem khorem, torui mhojê-von odik lagxilo êk soiro tuka asa.
13. Aichê ratik, hanga rav, ani sokallim, tuka suttka diuncho nem' pallchi taka khuxi asot zalear ekdom' borem zalem, to tuka suttka dium-di. Punn zôr to toxem korunk fuddem sorona zait zalear, jivea Devachean soput gheun sangtam, hanv tuka suttka ditolom. Sokall zai-sor hangach add podd.'
14. Mhonnttôch sokall zai-sor ti tachea paiam-xim ravli punn, sokallim, monis mon'xak vollkhunk xokta tê adim, ti utthli; ani tannem chintlem, 'hi ostori foddar aili mhonn dusreank gomonk favona'
15. Tedna tannem mhollem, 'Tujea angar asa tem avoronn pattlai ani dhôrun rav.' Tinnem toxem kelem tedna, tannem zovachim sô mapam tantunt ghalim ani uprant ticher ubarlim, ani ti porti nogrant geli.
16. Ruth ghora pavtôch, tichê sasumain tika vicharlem, 'Dhuvê mhojê, sogllem koxem zalem?' Tedna tea mon'xan apnnak kel'lem titlem-i tinnem tika sanglem.
17. Tannem mhaka him sô zovachim mapam dilim ani mhollem, "Rikamea hatamnim tujê sasumai-xim tunvem vechem nhoi. " '
18. Naomin mhollem, 'Mhojê dhuvê, sogllem tharear poddo porian xant rav. Aicheach disa bhitôr, soglleô vostu tharear ghalea xivai to ravchona mhonn mhaka khatri asa.'
