1. Sorvespora! Amcher vaitt ailam tacho ugddas kôr; amcher nodor mar ani amkam loz bhogta ti polle.
2. Amchea daizacho dês porkianchea hatant poddla, ani amchim ghoram-daram videxianchê adhin zaleant.
3. Ami onath zaleanv, amkam bapui na; amcheô avoiô atam vidva zaleat.
4. Amchench udok ami viktem gheunk pavleanv, amchoch zollôv vikto gheuncho poddta.
5. Amchê manir zum ghal'lem asa, ami dhumallo sôstanv, amchem boll sarkench mòddlam, amkam visôv na.
6. Goroz tem tori jevonn-khann amkam aschem mhonnun Ejipta ani Assiriê kodde vochun bhikmagchi poddli.
7. Amchea purvozamnim pap kelem ani tim morun gelim; ani tanchea guneanvancho bhar amchea mathear poddla.
8. Gulam' amcher podvi choloitat; tanchea chopkeantlim amkam nivarunk konnuch na.
9. Oronneantlea lokachê tolvarik lagun amcho jiv sonkoxttant ghalun, amcho giras ami zôddtanv.
10. Amchi kat agttea vori zollta, itlo amkam bhukechea vollvolleamnim zôr aila..
11. Sionant bailancher bolatkar kela ani Judachea nogramnim choliancher.
12. Kunvrank tãnnim hat bandun gollar choddoileat; mhatareank tãnnim man dilo na.
13. Tornnatteank tãnnim bollan dantear bosoile, ani zollovachea bharan chole chepleat.
14. Xarachea darvonttea-xim zannteamnim vechem sôddlam, ani tornnatteanchim songitam bond poddleant.
15. Amcho sontôs kallzantlo uddun gela; amchem nachop-uddop roddnnem zalam.
16. Amchi soglli vhoddvik. atam bhuim poddli Kottakotta amchem! Ami patok kelam!
17. Heach pasot amchem kalliz khontovlam, dukamnim bhorlolea amchea dolleank kãi dixtti poddona.
18. Kiteak Sion Dongôr padd zala; kole tacher firot asat.
19. Torui Sorvespora, sasnnak Tum asai, Tuji razvôttki pinddkechê pinddkek togta.
20. Kiteak mhonn sodanch amcher visôr ghaltoloi? Itlo kall kiteak mhonn Tum amkam sanddtoloi?
21. Amkam Tujê-xim portun ie-xim kôr ,Sorvespora, ani ami portun ietoleanv adle amche dis amkam porot di.
22. Na tôr, kodinch sompona toslea krodhan Tunvem amkam sarkinch sôddun dilim-i mhonn ami dhôrchem.
