1. Kitlem mhonn Sorvesporan Aplearagan Sion-Xar kallokhan guttlailam! Israelachi mhoima Tannem sorgar thaun zomnir xevttili, Aplea krodhachea disa Tannem Aplem Mondir poriansôddun dilem!
2. Kakluti vinnem Sorvesporan Jakobachea sogllea ghorabeancho nas kelo. Aplea ragachê xiranttin Tannem Judachê dhuvechim kottam môddun uddoilim; Tannem zomnir xevttilem raj ani tachea kunvrank, tancho man sarkoch uboilo!
3. Aplea zolltea ragan Tannem Israelachem sogllem boll môddun ghalem; dusman ietalo tedna ,Tannem Aplo bollixtt uzvo hat pattim kaddlo; bhonvtonnchea soglleacho bhosm kortolea agtteavori To Apunnuch Jakoba modem uzo zalo.
4. Dusmana vori Aplo dhonu bagailo, mokhunk Aplo uzvo hat haloinastana ghôtt dhôrlo. Jimkonn Tacho sontôs ani dhadosponn aslim, tankanch, xotru zal'lê porim, Tannem marun uddoilim. Sionachê dhuvechea tombucher ujea sarko Aplo kinv ôtlo.
5. Dusman zal'lê porim Sorvesporan Israelacho nas kelo; sogllea raz mondirancho bhosm kelo, tanchim sogllim kottam môddun uddoilim. Judachê porjecheô dukhi ani roddnnem Tannem vaddoilim.
6. Aplench khaxa Mondir fulam-bag zal'lê bhaxen, Tannem môddun ghalem. Sionant utsovancho ani Son'varancho ugddas porian Sorvesporan pusun kaddlo; ani Aplea krodhachea zallan, razak ani iadnikak Tannem patt vôll'li.
7. Sorvesporan Apli vedi sôddun dili, Aplea Povitr-Zageak To kanttall'lo, tachea razvaddacheô vonnti dusmanachea tabeant Tannem keleô. Utsovacho dis zal'lê porim, Sorvesporachea Mondirant zoikarancho boball zalo.
8. Sion-Xarachim kottam moddun uddounk Sorvesporan nirnnoi ghetlo. Dori gheun tanchi lambai Tannem mezun kaddli ani sogttacho nas kori porian Aplo hat pattim kaddlo na. Oso kottancher ani bhurinjancher Tannem sontap haddlo; tim atam sogllinch konsllun poddlim.
9. Tache darvontte poddun zomnint purovleat; tanche addambe moddon tanche kuddkean-kuddke zaleat; tacho raza ani tachê kunvor pordesant pavle; Somurtichi xikovnn diunk konnuch na, provadiank Sorvesporachem dorxon melloch na.
10. Sion-Xarache malgodde gopchup zomnir bosun asat; tãnnim aplea mathear dhul'l uddoilea; angak sakafottem ghalam. Jerusaleachim tornnattim cheddvam apleô tokliô bagaun zomnik dolle lavun bhonvtat.
11. Roddun-roddun mhojea dolleank puro zalem, mhojê porjechea nisonttonak lagun, Xarachear osteancher bhurgim ani dudachim ballkam jhintt ieun poddtat mhonnun, mhojem a'kkhem soimbbhitorlê-bhitôr dukhin kollvollta.
12. Zokmi zal'lea mon'xam vori Xarachea rosteancher jhintt marun tim poddtat ani aplea avoiank tim magit magit asat:: Amkam bhuk laglea! amkam tan laglea! Aplea avoianchea hodd'ddear tim prann sôddunk pavleant.
13. Jerusalea, mogachea Sion-Xara, Tuka buzvônn diunk kitea lagim mhonn tuka sôr korum hanv? Tujê sarkem atam konn asa? Somdira iedi vhôdd tuji desvatt! Konn khoinsôr-ui mellot tuje ghave pekounk?
14. Tujea provadiamnim tuka fottkirim dorxonam sanglim, aplea utramnim tãnnim tuka fosoili. Tuji vankdd ivatt sôddun jivit bodlunk, tujem khotteponn spoxtt korun tuka dakhoilem na, tuka porgôtt kel'lim dorxonam zaun aslim sogllim fottkirim.
15. Tujê vatten ietat-vetat titlim-i tuka polleun talliô pêtt'tat; Jerusaleachem ghorttann polleun fivnniô ghalun tokliô haloitat. 'Hench nhoi tem Xar, sundoriam modem sundori mhonnttalim tem? hench nhoi tem, ak'khea sonvsaracho obhiman?!'
16. Soglle tuje dusman ekach tallean tujer add aplem tondd ugôddtat; te fivnniô ghalit dant korkoraitat; te mhonnttat: 'Ami tika gill'li! Hoch to dis, ami tellun ravtaleanv to! Xekim to ami dekhlo!'
17. Apnnem ievjil'lem tem Sorvesporan kelem, magam tharail'lem ani dil'lem utor pall'lem. Doiê vinnem tujem nisontton kelem, tumchea xotrunchem boll vaddoilem, ani tumchea dusmanank tumchê vixim sontosunk dilem.
18. Sion Xara, Sorvesporak vhoddlean ulo mar ani pinrgot rav! Rat ani dis tumchea dolleantlim nodi vori dukam vhanvum-di; visôv tumkam dium nakat, tumchea dolleank fursôt dium nakat!
19. Utthat! Ratchea vellar, dôr-eka parar, bob marit rav! Sorvespora mukhar tujem kalliz udka vori vharoi! Tujea bhurgeancho jiv rakhchê khatir tuje hat Tachê thaim ubar, kiteak sogllea rosteam-nakeanr tim bhuken tollmolltat.
20. Chintun polle, Sorvespora! Konnank tori Tunvem hê porim vollvollaileãi? Apleach kusveachea ballank, moipasan ballgil'lea bhurgeank, bailamnim khaunchim hoi? Sorvesporachea Mondirant iadnikancho ani provadiancho prann kaddunk pavle!
21. Bhurgim ani mhatarim rosteanchê dhullint poddlolim asat. Mhoje tornnatte ani tornnattim tolvarichea ghansak sampoddleant. Tujea krodhachea disa Tunvem tankam jivexim marleãi, Doiê vinnem tancho prann kaddlai.
22. Charui vattantlean mhojer akanteka utsovak zal'lê porim Tunvem ektthaileai Sorvesporachea krodhachea disa konnachean pollun vochunk, nhoi mhonn jivo urunk, zalem na. Hanvem ballgil'lea ani voir kaddlolea sogllea mhojea dusmanank nanchkelim.'
