1. Tachea krodhachea danddea khalvaitt-vignam bhôglolo monis hanv.
2. Uzvaddak nhoi punn kallokhant Tannem mhaka pavoila.
3. Dis-bhôr bogor-bogor Aplo hat fokot mhojer ubarit asa.
4. Kat oddun kaddun mhojem mas Tannem jivo ghavo kela, mhojim haddam Tannem môddun uddoileant,
5. konixttaiechem ani khontichem kopel mhojea matheak ghalam.
6. Magam morun gel'leam vori kallkia khonddant jieunk mhaka uddoila.
7. Mhaka Tannem veddho ghala: bhair sorunkuch zaina; khoddeamnim mhaka bandla;
8. huêl marun Tacho adar magtam tedna porian mhojea magnneak To kan dina.
9. Mhojê vatter Tannem lobram ghaleant, mhojeô vattô addaun dovorleat.
10. Vanxela bhaxen To mhaka doddeak ravlo, lipun ravlolo xinv koso mhojea angar Tannem uddi marli.
11. Tannem mhaka marga velo ôddun kaddlo, mhaka pisuddlo, ani mhoje kuddke korun sôddlo.
12. Aplo dhonu Tannem bagailo ani Aple bann mhojer mokhle.
13. Aplea poteantle bann Tannem kaddun sôddle ani mhojea angant rigoile.
14. Sogllea mhojea lokak hanv kenddnniancho mhal zalam, dis-bhôr tim mhojê vixim podam kortat.
15. Kôddsannin Tannem mhaka bhôrla, koddu sorean mhaka bebdo kela.
16. Xenkareamnim Tannem mhoje dant môddle ani mhaka gobrant lollunk sôddlo.
17. Mhojea jivak xanti na atam, sukh kitem tem hanv nokllom.
18. Atam hanv mhonnttam: 'Sorvesporacher aslo to mhozo thir bhorvanso ubun gelo.'
19. Mhojea dolldirponnacho ani khonticho ugddas kôr: sogllench kiraitem ani pint!
20. Bogor-bogor tancho ugddas korun virgun gela jiv mhozo.
21. Novean bhorvanso dhôrunk hem ekuch hanv monant haddtolom:
22. Sorvesporache upkar sompunk nant, Tachea visvaxi doiall mogak xevôtt na.
23. Dôr sokallim to novean udeta, vhodd Tachem visvaxiponn!
24. Sorvespora bhair mhaka kãich na: oxem hanv mhonnttam, dekhunTacheruch mhozo bhorvanso!'
25. Tacher visvas dovortat ani Taka sôdtat tankam Sorvespor boro.
26. Sorvespor suttka ditolo mhonn visvas dhôrun gopchup ravlear borem.
27. Aplê tornnê piraier thaun Devachê khuxechem zum khandar gheunk xiklear borem.
28. Sorvespor amcher Aplem zum ghalta tedna eksurim ani gopchup boschem,
29. dhul'lint aplem tondd ghalchem, kiteak ghoddiê ozun bhorvanso asot.
30. To thapott marunk ieta tedna, polo Devak dakhouncho ani opmanancho bhar sosnnikaien gheuncho.
31. Sorvespor konnankuch sodam-sodanch Apnna thaun pois dovorcho na.
32. Dukh-khônt dhaddit tôr, To kaklut dakhoitolo itlo vhôdd Tacho visvaxi môg!
33. Aplea dhadosponna pasot To mon'xank koxtt ani dukh dhaddina.
34. Eka desachea sogllea koidiank pãiam tolla mostitat tedna,
35. Sorvesporachi porva korinastana mon'xanche ho'kk maddoitat tedna,
36. khoinchea-i mon'xak onit kortat tedna, hem sogllem Sorvespor pollena kitem?
37. Sorvespor hukum' dina tôr, konn tori apnnem sanglam tem ghoddon ie-xem korunk xokot?
38. Sorvesporachea tonddantlem nhoi zalear, khoim thaun borem vô vaitt ieta?
39. Amchea patkam pasot khast bhôgtanv zalear, kiteak mhonn ami xinn korcho?
40. Kosli vatt ami dhôrloli ti topasun polleum-ia ani Sorvespora thaim portun ieum-ia,
41. sorginchea Devak amchim kallzam ani amche hat ubarum-ia.
42. Aminch pap kelam, ami kolpoleanv, ani Tunvem amkam bhôgsunk naim.
43. Ragan bhoron amchê pattik lagloi,doiê vinnem amcho prann kaddloi.
44. Tujê-xim magnnem pavunk xokona titlea dhatt kupan revddon Tumlipun ravlai,
45. Raxttram mukhar Tunvem amkam koir ani kochro korun sôddleãi.
46. Sogllea amchea dusmanamnim amchi ninda korunk tondd ugôddlam.
47. Akant ani kondd, nuskan ani nisontton, hench amchem daiz.
48. Mhojê mogachê porjechea nisonttonak lagun mhojea dolleantleô vhanvtat dukancheô nodi.
49. Sorgar thaun Sorvespor dixtt ghali porian
50. thar nastana, visôv nastana, mhojea dolleantlim vhanvtolim dukam!
51. Mhojea Xarachea sorv dhuvanchem durdoiv polleun mhojem kalliz bhov dukhovlam-khontovlam.
52. Karonna viret, hanv ek suknnem zal'lê porim, mhaka mokhun uddoilo.
53. Eka konddant mhaka uddoilo ani mhojer êk fatôr ôddun tem dhamplem.
54. Mhojea mathea voir udok choddlem; hanvem mhollem: 'Mhozo xevôtt pavlo!'
55. Khôl khonddant thaun, Tujem Nanv gheun, Sorvespora, hanvem Tuka ulo marlo.
56. Tunvem mhozo tallo aikolai, tôr mhojea uleak Tuje kan bhere korum naka.
57. Hanvem tuka ulo marlo tea vellar Tum lagim sorloi; Tunvem mholleim: 'Bhieum naka!'
58. Tum, Sorvespora, mhojê vatten ubo zaloi, mhozo jiv Tunvem soddoiloi.
59. Sorvespora! Mhaka onit kelea ti Tunvem dekhleai; mhaka neainit korun di.
60. Mhozo sudd gheunk sôdtat mhonn Tum polletai ani mhojer guddmêll kortat te Tunvem dekhleai.
61. Sorvespora, mhojer kel'leô ninda ani tanchim karasthanam tum aikotai.
62. Dis-bhôr mhojea dusmanamchem mhojer add gunngunnop an ifutfutop Tum aikoitai.
63. Te boslole asum vô ube asum ,polle, sodanch hanv tanchem dulpod zalam.
64. Tanchea kornnianchem favo titlem farikponn ghe, Sorvespora!
65. Tanchim kallzam nibor kôr, Tuzo xirap tancher poddum.
66. Ragan bhoron, Sorvespora, tanchê pattik lag, ontralla pondle tankamumttun uddoi!
