1. Mhonnttôch, mhojea bhavam-bhoinnimnô, kitli mhaka tumchi opurbai asa ani kitlo mhonn hanv tumkam polleunk axetam! Tumchê vixim kitlo sontôs ani obhiman mhaka bhògta! Oxem tôr, mhojea priticheamnô, Somia sovem thir ravat.
2. Euodiê kodde prarthun magtam, toxench Sintikê kodde prarthun magtam, Somia sovem tim eka monachim zaunchim.
3. Ani tum, mhojea visvaxi vangddia, tujê lagim hanv vinoti kortam, tankam adar di: heô bailô, Klementi ani heram mhojea sohokariam borabôr, Xubhvortoman porgôttunk mhojea vangdda zhuzleat: hanchim nanvam jiveanchea pustokar boroil'lim asat.
4. Somia sovem sodanch khuxal ravat; novean sangtam: khuxal ravat.
5. Tumchi dulobai soglleank dixtti poddum-di. Somi ieuncho zalo.
6. Koslech huske kaddum nakat; sogllea tumchea magnneamnim tumkam goroz titlem-i Devak kollit korat, punn tumchim magnnim dhinvaxi kallzan kel'lim zaum-di.
7. Ani amchea gineana poros vorti Devachi xanti tumchim monam ani kallzam Jezu Krista sovem rakhtoli.
8. Xekim, bhavam-bhoinnimnô, borea ani man favo aslolea gunnancher tumcho iklo dovrat: jem kitem khorem ani vortem, jem kitem nitin sarkem ani guneanva-mekllem, jea kiteachi ami opurbai ani tokhnnai kortanv, tumchea monant gholloiat.
9. Mhojê koddlem tumi xikleant titlem-i tumi korat: hanvem tumkam dileat teô chali, mhojea tonddantlem tumi aikolam tem vô mhojê vagnnukentlean tumi dekhlam tem. Hê porim amchim kallzam xantin bhôrta to Dev tumchê sovem astolo.
10. Boroch vêll korun, atam tôri anink êk pavtt mhojê vixim tumi husko dakhoila mhonn Somia sovem hanv ekdom khuxal zalam. Adim porian mhozo tumkam husko aslo mhonn hanv manun ghetam, punn to dakhounk tumkam soêg mellunk naslo.
11. Mhaka kitem unnem zalem mhonn hanv oxem sangina, kiteak mhojê lagim asa titleanuch sodam dhadoxi asunk hanv xiklam.
12. Gorjecheô vôstu nastana vô goroz tea-vôn odik asun jieuncho mhaka onnbhov asa; khõisor-ui ani koslê-i poristhitint jieuncho gutt hanv xiklam: upaxim ravunk vô pottbhôr jevunk-khaunk, subhamponnant vô lacharponnant jieunk, kiteak-ui hanv toiar!
13. Hanv kitem-i korunk xoktam kiteak mhaka xokti diunk Jezu asa.
14. Tôri mhojea koxttamnim mhaka adar diun tumi borem kelem.
15. Poilinch Xubhvortoman porgôttunk hanv Masedonientlo bhair sorlom tednam, tumchê bhair khõichêch Povitr-Sobhen mhaka adar diunk na: tumkam, Filipkaramnô, hi soglli khobor asa. Fokot tumi mhaka poixe dhaddun dile.
16. Tesalonikent astana mhaka goroz poddli tednam, êkuch pavtt nhoi punn don pavtti tôri, tumi mhaka pavleant.
17. Tumchea dananchi axa mhaka asa mhonn somzum nakat, punn udar monan kel'lea tumchea dananchem foll vaddta mhonn polleun hanv sontosta.
18. Sod'deak goroz tem ani tachê-vôn chodd mhojê lagim asa. Epafrodita kodde diun tumi dhaddlolim danam gheun hanv bhòrlolo asam. Tim danam domdomit pormollachem somorponn, Devak avoddta ani To manun gheta toslo iôdn.
19. Mhozo Dev Jezu Krista vorvim Aplê subham dovlotintlem kaddun tumchea gorzamnim tumkam pavtolo.
20. Oxem tôr, Devak, amchea Bapak, mhoima sasnnachea sasnnak. Amen.
21. Jezu Kristachea ekvottant aslolea dôr-eka bhoktak noman kortam. Mhojea sangata asat tim bhav-bhoinn tumkam noman kortat.
22. Sogllea bhoktancho nomoskar tumkam, bhov-korun Somrazachea razvaddeantlea bhoktancho.
23. Somia Jezu Kristachi doiallai tumchê sovem asum.
