1. Filipi xarantlea Jezu Kristachea ekvottant aslolea sogllea bhoktank, tanchea vhoddilank ani sevokank, Paulu ani Timot, Jezu Kristacho chakor, noman kortat.
2. Deva amchea Bapachi ani amchea Somia Jezu Kristachi doiallai ani xanti tumchê sovem asum.
3. Tumcho ugddas kortam titlê-i pavtti tumchê pasot hanv mhojea Devak dhinvastam,
4. ani tumam somestam khatir prarthon kortam titlê-i pavtti khuxalkaien tem kortam,
5. kiteak poilea disa thaun tem aiz porian Xubhvortomanachea mhojea vavrant tumi mhaka adar dila.
6. Devan tumchê modem ho boro vavr suru kela, tôr Toch, Jezu Kristacho Dis ie porian, ho vaur xarti pavoitolo mhonn mhaka khatri asa.
7. Tumkam mhojea kallzant hanv gheun asam, ani tumam-somestam vixim him bhavnna mhaka asunk favoch. Kiteak Devan mhaka favo kel'lea denneant, mhonngê mhojea sankllimnim ani Xubhvortoman rakhchea ani thir korchea kamant, tumi sogllim mhojim bhagidaram.
8. Jezu Kristachea kallzachea mogan tumam-somestancho hanv kitlo môg kortam, hacho khud Dev mhozo govai.
9. Tumcho môg odik-odik vaddom, sotachi odik unch vollokh ani odik khôl onnbhov tumkam mellum, ani hê porim kitem odik borem tem tumi sodanch vinchun kaddunk pavum: hem mhojem magnnem. Oxem nirmoll ani niropradi zaun, Kristachea Disak tumi toiar astoleat.
11. Devak manta toslea jivitachim follam Jezu Krist amchê sovem utpon korta; oslea follamnim tumchem jivit tea Disa bhoron ietolem, ani oxi Devak melltoli mhoima ani vakhann'nni.
12. Bhavam-bhoinnimnô, mhoji atanchi poristhiti Xubhvortomanachê porgôttnnek odik faideachi zali: hem tumi zanno zal'lim mhaka zai.
13. Krista khatir mhaka bondkhonnint ghala mhonn, nhoi fokot razvaddeantlea soglleam modem, punn hera-i sogllea loka modem gazlam,
14. ani hanv bondkhonnint asam dekhun, zaitea bhavam-bhoinnincho Somiacher dovorlolo bhavarth odik ghott zaunk pavla, ani tim odik dhiran ani bhiranti vinnem Devachem utor porgottunk lagleant.
15. Tantlim kai zannam nattkaien ani ekamekak virodh korun Kristak porgott'tat tem khorem, punn dusrim borea monan kortat.
16. Him nimannim, Devan mhaka Xubhvortoman rakhpacho vavr dila mhonn zanna zaun, mogan vavurtat.
17. Tim poilim, khorea monan nhoi punn nattkaien Kristak porgott'tat tim, mhoje bondkhonnicche tras vaddoitolim mhonn somzotat.
18. Punn kai porva na: koxe-i bhaxen, borea vo vaitt monan, Krist porgott zata, ani hakach lagun hanv khuxal asam;
19. ani hanv khuxaluch ravtolom, kiteak tumchea magnneanim ani Jezu Kristachea Atmeachea adaran, hem mhaka suttka mellunk upkartolem mhonn hanv zannom.
20. Mhozo khotkhotit anvddo ani bhorvanso hoch, ki hanv kiteanuch lojek poddcho na ani, hanv morum vo jivo asum, sodanch toxem atam-i, kalljidarponnan bhoron hanv fuddem vetolom, ani mhoje kuddint Kristak vhoddvik melltoli.
21. Mhonnttoch mhojea jivitak koslo orth asa? Fokot Krist mhojea jivitak orth dita; punn hanv moron zalear, odik faido zatolo.
22. Oxem astana, jivo urun mhojean odik faideachem kam' korunk zata zalear, hanvem kitem vinchun kaddchem tem mhaka somzona.
23. Don-ui vattamnim hanv oddon vetam: eke vatten hem jivit sompoun Krista sorxem asunk hanv otrektam, ani hem ekdom' odik borem;
24. punn, dusre vatten, hanv jivo urlolo tumche pasot odik gorjechem.
25. Tumkam odik dhir diunk ani bhavartant tumchi khuxalkai vaddounk hanv jivo urtolom ani tumam-somestanchea vangdda astolom mhonn hanv khatren zannom.
26. Ani hê bhaxen, hanv tumchê modem portun ietôch, mhojê khatir Jezu Krista sovem tumkam obhiman bhògta to ekdom vaddtolo.
27. Tem kitem-i zaum, Kristachea Xubhvortomanak sobta toslem tumchem jivit zaunk zai; oxem, tumchê modem vochun hanv khaxa polleunk pavum vô pois thaun tumchi khobor aikum, tumi eka kallzachim zaun thir ubim asat mhonn ani Xubhvortomanachea bhavartha khatir ekach monan vangdda zhuztat mhonn mhaka gomun ieum.
28. Tumchea dusmanank koxêch bhaxen tumi bhieum nakat. Tanchem nisontton zatolem ani tumkam suttka melltoli mhonn, hi êk Devan dil'li khunna zatoli.
29. Kiteak Kristacher bhavarth dovrunkuch nhoi, punn Tachê khatir koxtt-dogd sõsunk-ui Devan tumkam favo kelam.
30. Tumi mhaka zhuzlolo pollela ani ozun porian hanv zhuztam mhonn tumi aikotat, teach zhuzant tumkam-i vantto asa.
