1. Kristachea ekvottant tumchea jivitak ghottai mellta mum? To tumcho môg korta mhonn zanna zaun tumkam buzvônn mellta nhoi? Êkuch Povitr Atmo tumi ghetla nhoi? Tumkam ekamekachi opurbai asa ani ekamekachi konnvallai dista mum?
2. Toxem zalear, ekchitachim, ekach mogachim, ekach monachim ani êkêch khuxechim zaiat; tednam ki tumi mhaka sarko dhadoxi kortoleat.
3. Svarthi axen kãich korum nakat, suki boddai korum nakat, punn khalteponnan dusrim tumchê-vôn vortim mhonn dhôrat;
4. ap-aplea faideachem kitem tem polleum nakat, punn dusreak kitem faideak poddtolem tem polleiat.
5. Jezu Kristachea monant ani kallzant aslem tench tumchea monant ani kallzant asum-di:
6. Devachea soimbacho To, punn Devachi gôt Tannem axen samball'n dhorunk na.
7. Apnnakuch khali kelo, mon'xachem sarkem ghetlem, gulama-akar dhôrlo. Mon'xanchê gotint jieun,
8. lhanvik vinômr To zalo. Moronn, khursachem moronn, Apnnacher ghei porian Devak To khalto zalo.
9. Dekhunuch Devan Taka unch sorgar ubar'n vhelo ani Nanv Taka dilem soglleam nanvam-vôn vôrtem.
10. Mhonnun atam sorv rochnna sorgar, prithver, patallant Jezuchea Nanva mukhar saxttangim vondon korum
11. ani Jezu Krist Somi mhonn porgôtt korun soglleô jibô umallean Deva Bapak mhoima dium.
12. Mhonnttôch, mhojea priticheamnô, hanv tumchê modem aslom tednam, tumi mhojea utrak khaltim asleat; têch bhaxen atam, hanv tumchê thaun pois astana, tumi khaltim aschi odik goroz; ani tumchi purnn suttka tumkam mellchê khatir bhieun ani kampun proitn korit ravat;
13. kiteak mhollear, Apli mogachi ievzônn xarti pavôi-sôr, khud Dev tumchêm mon thir korit asa ani tea pormannem jieunk tumkam boll diit asa.
14. Gunngunnun vô vivad korinastana, kitem korchem asa tem korat.
15. Hê bhaxen tumi niropradi ani nirmoll Devachim bhurgim zaunk pavtoleat, khottê ani baskôll pinddkê modem khotnaslolim; jhigjhigtea noketram vôri tumi sonvsarant porzollunk zai ani, jivitachem Utôr tankam ditana, tumi tanchê modem mollbar jhigjhigtea noketram sarkim zaunk zai. Oxem tumi cholxat zalear, soglle mhoje proitn ani koxtt nirfoll zaunk nant mhonn Kristachea Disa mhaka obhiman bhogunk karonn astolem
17. Khorench, Devak bhettoil'lea tumchea bhavarthachea iodnacher mhojem-i rogot varoun somorponn korchem poddlem tôr, hanv khuxall ani tumam soglleam borabôr hanvui sontosbhorit zatolom.
18. Toxench tumi-i khuxal zaun mhojê borabôr sontosbhorit zaiat.
19. Timotak vegim tumchê-xim dhaddunk zatolo mhonn hanv Somia Jezucher patietam; hê bhaxen tumchi khobor gheun mhojem mon somadhan zatolem.
20. Mhojeach kallza-monacho ani tumchi khorea monan kallji gheupi dusro konn mhojê lagim na.
21. Heram soglleank Jezu Kristachem poddunk na, te ap-aplench polleun asat.
22. Punn Timot koso chol'la to tumi tôr dekhlam: êk put aplea bapaichea vangdda kam korta, toxem tannem mhojê borabôr Xubhvôrtomanachem kam kelam.
23. Mhojem kitem zatolem tem mhaka gomlea uprant, taka veginch tumchê-xim dhaddunk zatolem mhonn ravtam.
24. Ani hanvuch rokddo tumchê-xim pavtolom mhonn mhaka Somiacher visvas asa.
25. Amchea bhava Epafroditak tumchê-xim dhaddchi goroz asa mhonn mhaka dislam. Mhojea vavrant ani mhojea zhuzant to mhozo vangddi zaunk pavlo; tumi taka patthoil'lo mhonnun, hanga ieun tannem mhaka adar dilo.
26. To tumkam soglleank polleunk axetalo, ani apunn piddêst zala mhonn tumkam khobor pavli dekhun taka khônt zali.
27. Khorench to ekdom boro naslo ani morunk pavlolo, punn Devan tachi doia keli; tachich nhoi punn mhoji-i Tannem doia keli ani mhojer, dukhancher dukh poddona-xem kelem.
28. Dekhun zata titlê vegim taka tumchê-xim dhaddunk odikuch hanv anvddetam, kiteak taka polleun tumi novean khuxal zatoleat ani mhojê khontint mhakai buzvônn melltoli.
29. Mhonnttôch Somia sovem sogllê khuxallkaien taka gheiat; tachê oslea sogllea mon'xank man diat;
30. tumchêan mhaka diunk zainaslo to adar diunk tannem aploch jiv sonkottant ghalo ani oso Kristachea kama khatir to morunk pavlolo.
