1. Xekim, bhavam-bhoinnimnô, Somia sovem khuxal ravat. Tumkam adim boroilam tem anink êk pavtt sangunk mhojê vatten koslich addkhôll na, ani tumchich rakhônn korunk tem upkartolem.
2. Tea sunneank lagim gheunkuch nakat! Te khotte vavraddi! Noxttea kortubank lobhdol'le monis te! Ang katrunk bhonvtat tosle monis te!
3. Ami ki sunôtichi khori porza, kiteak ami Devachea Atmea vorvim Taka bhoztanv; angar kel'lê khunnecher amcho visvas na, punn Jezu Kristacher amcho obhiman.
4. Mhojean-ui masa-rogtacher visvas dovrunk zatalo; ani konn-ui angar kel'lê khunnecher visvas tthevunk apnnak karonn asa mhonn somzota zalear, mhaka odik karonn asa.
5. Atth disancho astana mhoji sunôt keli, hanv zolman Israelachea raxttracho, Benjaminchea kullacho, Hebrevank zolmol'lo Hebrêv. Somurt pallchê babtint hanv êk Farizêv;
6. hurben itlo bhòrlolo, ki Povitr Sobhek hanvem dhumallo dilo. Somurti thaun upzota tea promannikponnachê babtint mhaka koslich chuk nasli.
7. Heô soglleô vôstu mhaka faideacheô asleô, punn atam Krista pasot teô hanvem nuksann mhonn lekhleô.
8. Jezu Kristachi, mhojea Somiachi, vollokh itlea unch molachi ki Tachê pasot sogllem hanvem sôddun dilem, sogott xenn mhonn dhôrlem. Koslê axen? Kristak zôddun gheunk
9. ani Tachea ekvottant jieunk mhaka favo zaunk hi êkuch mhoji axa. Mhojeach kornniamnim zôddlolem, Somurti thaun ieta tem promannikponn anink mhaka na; punn Kristacher hanvem bhavarth dovorla mhonnun, hea bhavarthak lagun Devan mhaka funkea Apnnak manovlolo kela.
10. Oxem Jezuk vollkhunk, Tachea punorjivontponnachem boll onnbhovunk, Tachea koxttamnim vantto gheunk, Tachea mornnant Tachê-sarko zaunk: itleakuch hanv otrektam.
11. Hê bhaxen mel'leantlo punorjivont zaunk pavtolom mhonn mhaka bhorvanso asa.
12. Hanv xevottak pavlom vô sopurnn zalom mhonn somzum nakat. Na! Hanv inam' jikhunk ozun dhanvot asam, kiteak heach pasot Jezu Kristan mhakach jikhun ghetla.
13. Bhavam-bhoinnimnô, jikhlom mhonn somzun hanv murgottna; punn itlench sangtam: pattim sôddlam tem visrun, fuddem asa tacheruch dolle lavun, sogllea mhojea bollan nitt xevottak hanv dhanvun vetam.
14. Jezu Krista sovem voir sorgar inam' jikhunk Dev amkam apoita: tem inam' mhozo xevôtt.
15. Ami bhavarthant vaddlolim mon'xam dekhun, hêch bhaxen ami chintchem; punn konnachem- i mot vegllem zalear, hem-i tumkam Dev ugddapem kortolo.
16. Kitem-i zaum, ami aiz porian pavleanv thoim thaun teach rostean fuddem vochum-ia.
17. Mhojea bhavam-bhoinnimnô, sogllim tumi vangdda mhoji dêkh gheiat ani mhoji dêkh gheun choltoleancher dolle dovrat.
18. Atam hanv sangunk vetam tem adim zaitê pavtti tumkam sangtalom, punn atam tench novean sangchem poddta; mhaka itli khônt bhògta ki mhaka roddunk ieta, kiteak mhollear zaitim zannam khursar mel'lea Kristachim dusmanam zal'lê porim choltat;
19. oslim mon'xam nisonttonak pavtolim; tim bhôztat to dêv tanchem pott; jê vostuchi tankam loz dischi asli, tichi tankam vhoddvik bhògta; tanchem dhean-mon fokot sonvsari vostuncher asa.
20. Punn amcho khaxa dês sorgar asa; ani sorgar thaunuch amchea Soddvonnarak, Somia Jezu Kristak, ami axeun ravtanv.
21. To hê amchê holkê kuddichem rupantor korun ti Aplê mhoimevont kuddi sarki kortolo; soglleô vostu Apnnachê adhin To korunk xokta têch podven To hem rupantor kortolo.
