1. Mhojea bhavam-bhoinnimnô, konn-ui koslea-i eka guneanvak sampoddlim zalear-ui, Povitr Atmo tumkam choloita mhonnttôch tankam dulobaien nitt margar haddat; ani tumi zonn-eklean, apunn-ui toxench tallnnent poddona zaunk, chotrai dhôrchi.
2. Ekamekacho bhar vahunk adar diat, oxem korun tumi Kristachi somurt palltoleat.
3. Jim konn, apunn kãich nhoi astana, apunn kitem tôri mhonn somzotat, tim apnnankuch fosoitat.
4. Zonn-eklean ap-apli vagnnuk topasun kaddchi ani, ti bori zalear, dusream lagim sôr korinastana, tachean vô tichean apnnachêch khatir khuxalkai bhôgum-ieta;
5. kiteak zonn-ekleak ap-aplem ojem uklun vhorchem asa.
6. Devachea Utrachi xikovnn ghetat tãnnim sogllê aplê asticho vantto apnnank xikoitoleank diuncho.
7. Tumchinch tumi fosovom nakat: Devak fosounk zaina. Tôr ami vômptanv tench ami lunvtoleanv.
8. Patki soimbachea vôndovnnianchea xetant ami vômplem zalear, hea patki soimbantli ami lunvtoleanv kusddai; punn Povitr Atmeachea xetant ami vômplem zalear, heach Atmea thaun ami lunvtoleanv Sasnnik Jivit.
9. Mhonnttôch thokonastana borem tem korum-ia: kiteak borem korchem sôddun dinanv zalear, tachem pik vêll pavtôch amkam melltolem.
10. Dekhun amkam dil'lo vogôt aso porian, soglleank borem korum-ia, bhov-korun bhavartha vorvim amchim bhavbhoinn zal'leank.
11. Atam mhojeach hatan him utram boroitam: kedea vhoddlea okxoramnim hanv boroitam tem borem-korun polleiat.
12. Je konn mon'xanchê nodrek boddai dakhounk sôdtat, tech te tumkam sunôt korunk boll kortat te. Ani oxem kiteak kortat zait? Fokot Kristachea khursak lagun apnnancher piddapidd iena zaunk.
13. Te apunnuch sunôt kortat khorem, punn Somurt kãi pallinant; Fokot tumchê kuddi vorvim apnnank man mellchê khatir, tumi sunôt kel'li tankam zai.
14. Mhaka zalear, vhoddvikechem karonn ekuch: Jezu Krist amcho Somi khursar melo, hich mhoji vhoddvik. Hea Tachea khursa vorvim mhaka sonvsar khursar mela ani sonvsarak hanv khursar melam.
15. Sunôt keli vô na keli, haka koslich bixat na: novi rochnna zaunk hem ekuch sorv mhotvachem!
16. Hea nema pormannem choltat titleancher-ui ani Devachê Israel porjecher denvum xanti ani kaklut!
17. Itlem sanglea uprant konnench mhaka anink tras dium noiê; kiteak mhojê kuddir asat te dag Jezu pasot hanvem bhôglolea koxttanche.
18. Bhavam-bhoinnimnô, amchea Somia Jezu Kristachi doiallai tumi odik-odik bhôgunk pavum. Amen.
