1. Ami atam svotontr zaleanv, kiteak Kristan amkam svotontr keleant. Mhonnttôch thir ravat, ani novean gulamponnachem zum tumcher gheum nakat.
2. Hanv, Paulu, tumkam sangtam: tumi sunôt korunk dixat zalear, Krist tumkam kiteakuch upkarona zalo.
3. Sunôt korunk ditat titleank-ui novean xiddkaitam: ak'khi Somurt pallunk tankam kaido asa.
4. Somurti vorvim zôr apunn Devak manovlolim zatoleat mhonn tumi ravtat, tôr tumcho ani Kristacho sombond tumi tôddun uddoilo, Devachi doiallai tumkam ontôrli.
5. Ami zalear, bhavarthak lagun, Povitr Atmo amchê sovem korta tea vavra udexim, Dev amkam Apnnak manovlolim kortolo mhonn bhorvanso dhôrun ravtanv.
6. Jezu Kristachea ektarant asloleank tãnnim sunôt keli vô na keli mhonn porvach na; mhotvachem tem ekuch pritimogachê sfurtin aplo vavr korit asa to bhavarth.
7. Bhavarthachea margar kitlea nettan tumi dhanvot asleat; tumkam vatter addaunk pavlo konn? sotachea marga velim konnem tumkam koddsorailim?
8. Devan tumkam apoileant, tôr hem tumchea monant Tannem ghalem mhonn koxêch bhaxen sangum nozo.
9. Sogllench pitt fugounk thoddench ambttem puro, oxem nhoi?
10. Somiachea ekvottant ami asanv, dekhun tumchem ani mhojem mon vegllem zaunchem na mhonn tumcher hanv patietam; ani toxench, tumkam khubddaita to, konn-ui to zaum, Devachê khastik sampoddtolo mhonn hanv ravtam.
11. Bhavam-bhoinnimnô, sunôt gorjechi mhonn hanv ozun porgôtt'tam zalear, kiteak mhonn hanvem ozun dhumallo bhôgcho poddta? Tem khorem zal'lem zalear, hanv kortam ti khursachi porgôttnni mhaka kosleach trasant ghalchi nasli.
12. Tumkam khubdaitat tãnnim, sunôt korchê korun, apnnankuch vôchun izdde korun sôddche.
13. Bhavam-bhoinnimnô, Devan tumkam svotontr zaunk apoileant; punn svotontrtaiechea niban mat patki soimbacheô khuxiô pallinakat; hachê svater ekamekachi pritimogan seva korat.
14. Kiteak ak'khi Somurt ekach utran attaploli asa: "Tuzo môg kortai toso tujea peleacho kôr."
15. Chotrai dhôrat: ekamekak ghans marun khaxat zalear, tumi ekamekacho nas kortoleat.
16. Sangtam tem hem: Povitr Atmeachê sfurti pormannem cholat ani patki soimbacheô khuxiô pallunk tumi pavchim nant.
17. Patki soimbacheô khuxiô Povitr Atmeachea khuxiancher add, ani Atmeacheô khuxiô patki soimbachea khuxiancher add; Povitr Atmo ani patki soimb ekamekacher zhuztat dekhun, tumchea patki soimbachea vondovnniam pormannem tumi cholum noiê.
18. Povitr Atmo tumkam choloita zalear, Somurt tumcher aplo odhikar choloina.
19. Patki soimba pormannem choltat tanchim kamam vollkhunk sompem. Oslim mon'xam pozoddponnant, mhelleponnant ani kamcharant lolltat;
20. kud'dea devak bhôztat ani ghaddianger dhanvtat; dusmankai samballtat ani zhogddeamnim dis kaddtat; nattkaien bhoron asat ani krodhan zolltat; peleachea vostunchi axa dhôrtat; dusongam ani pokxam udexim loka modem bhed-futti ghaltat;
21. futtlolea dolleamnim peleak polletat; soreak lobhdol'lim asat; dhumxannamnim rat sartat. Ani anink-ui oslim khotteponnam kortat. Tumkam adim xiddkaileant toxem, atam-i xiddkaitam: oslim kamam kortat tankam Devachea Rajeachem daiz bhôgunk mellchem na.
22. Povitr Atmo, dusrê vatten, oslim follam utpon korta: mon'xam modem pritimôg vaddoita; kallzamnim khôl khuxalkai upzoita; ekameka lagim sondhan korun xanti vosoita; domkavnniam mukhar thôndd ravunk adar dita; peleak borem korunk ani moipasan vagounk xikoita; ek-ekleak visvas favo-aslolo monis korta;
23. mon'xank dulob kallzachim korta; ap-apleô vondavnniô domaunk ghottai dita. Hê bhaxen jietoleanchi koslich somurt guneanv korunk xokona.
24. Jim konn Jezu Kristachim, tãnnim aplea ogunnam ani vondovnniam borabôr aplem patki soimb khursar marun dovorlam.
25. Zôr Povitr Atmeanchem Jivit, tôr Atmo amkam choloun vhorta toxim cholum-ia.
26. Ami amchich boddai korum noiê, ekamekak challoum noiê, ekamekachi nattkai dhôrum noiê.
