1. Fuddem vochum-ia: sogttacho dhoni zaun-ui, daiji lhan aso porian, tachê ani gulama bhitôr koslich ontôr na;
2. tachea bapain tharailolê piraiek to pavô-sôr, taka rakhunk ani tacho vevhar cholounk nemlole monis asat.
3. Têch porim ami sotachê vollkhichê babtint lhan asleanv tednam, srixtti choloitat teô podviô amkam aplea gulamponnant dovortaleô.
4. Punn nemlolo kall bhòrlo tednam, Devan Apleach Putak dhaddlo. Ho Put êkê bailê thaun zolmun ailo ani Somurti khal To jielo.
5. Somurti khal jietoleank suttka gheun diunchê khatir ani amkam Devachim apnnailolim bhurgim korchê pasot, Devan Taka dhaddlo.
6. Ani atam "Abba, Bapa!", oso ulo martolo Aplea Putacho Atmo Devan Apnna thaun dhaddun amchea kallzamnim ghala: hem tumi Tachim bhurgim mhonn dakhoun dita.
7. Dekhun tum hea fuddem gulam' nhoi; tum put. Tum put, mhonnttôch, Devan Aplea bhurgeank dovorlolem daiz tujem.
8. Adim tumi Devak vollkhonasleat, dekhun khore dèv nhoi tanchim gulamam tumi zal'leant.
9. Punn atam tumi Devak vollkholea uprant vô, oxem mhollear odik borem, Devan tumkam vollkhun ghetlea uprant srixtti choloitat tea nirbolli ani dolldirea podviam vatten koxim mhonn tumi portun vetat? Koxim mhonn tumi novean tanchim gulamam zaunk sôdtat?
10. Omkea-omkea disancho, mhoineancho, somoiancho ani vorsancho utsôv korun, osleanch somarombhancher asa tumchem lokx.
11. Tumchê modem kel'lo koxtti vavr sogllo funkôtt gelo kai? Ho mhozo husko.
12. Bhavam-bhoinnimnô, hanv tumchê lagim porathun magtam: mhojê sarkim zaiat, kiteak hanv-ui tumchê sarko zalom. Adim tumi mhaka koslench vaitt korunk na.
13. Piddek lagun tumkam Xubhvortoman poilêch pavtti porgôttunk mhaka soêg mell'llo: hem tumi zannont.
14. Punn Mhoji pidda tumkam bhov zhôdd zaun-ui, tumi mhoji beporva keli na, nhoi mhonn mhaka pois korunk na; urfattim, hanv êk devdut zal'lê porim, hôi, hanv khud Jezu Krist zal'lê porim, tumi mhaka ievkar dilo.
15. Tednam tumkam itli khuxalkai bhògtali: ti soglli khõi pavli atam? Tumchê vixim hanvuch sakxi ditam: ghòddlolem zalear, tumche dolle konchoun kaddun mhaka diunk tumi toiar asleat.
16. Tôr tumkam hanvem sot sanglem dekhun, tumcho dusman bi zalom hanv?
17. Xubhvortoman donsounk bhonvtat te tumkam apnnam vatten jikhun vhorunk hurba dakhoitat, punn tanchem mon sarkem nhoi; tumkam apnnam vatten jikhun gheunchê khatir, tumkam te mhojê thaun toddunk sôdtat.
18. Borea karonnak lagun herank jikhun gheunk sôdlear borem; punn sodanch toxem zaunchem, fokot hanv tumchê modem asam tednam nhoi.
19. Mhojea supurlea bhurgeamnô, tumchê sovem Kristacho akar purto zai-sôr hanv tumkam zolm diunk novean ballonterache vollvolle bhôgtam.
20. Hea vellar tumchê modem hajir asun tumchê kodde odik vhoddê dulobaien mhaka ulounk zal'lem zalear! Tumkam lagun hanv ekdom huskelam!
21. Sangat mhaka: Somurti khal tumi jieunk sôdtat mum? Tôr Somurt sangta tem aikunk na tumi?
22. Abrahamak dog put asle mhonn boroil’lem asa: eklo gulam’-cheddvacho ani dusro svôntontr bailecho.
23. Gulam-cheddvacho to soimbachea nemam pormannem zolmol'lo, ani svadhin bailecho to Devan Abrahamak kel'lê bhasavnnê udexim zolmol'lo.
24. Hea ghòddnniantli êk vôpar kaddum-ieta. Heô dogi bailô mhonngê don korar: êk mhollear Sinai Dongra velo; tacho rupkar Hagar ani ti aplea bhurgeank gulamam zaunk zolma haddta.
25. Hagar mhollear Arabient aslolea Sinai Dongracho rupkar, teach borabôr atanchea Jeruzaleacho-i rupkar, kiteak hem Jeruzalem aplea bhurgeam soit gulamponnant asa.
26. Punn adim sanglea ti svotontr bail sorgar thaun denvlolea Jeruzaleacho rupkar, ani hi ki amchi avoi.
27. Kiteak oxem Povitr Pustokar boroilolem asa: "Sontosbhorit za, vanzttê bailê, bhurgem-ball naslolê! Ballonteracheô dukhi bhôgunk naslolê, khuxal za, anondache ul'las sôdd! Tôr sôddlolê bailek odik bhurgim, ghovan kodinch sôddunk na tichê poros choddam!"
28. Mhonnttôch, mhojea bhavam-bhoinnimnô, tumi Izaaka porim bhasavnnechim bhurgim.
29. Tednam soimbachea nemam pormannem zolmol'lo bhurgo Devachê bhasavnnê udexim zolmol'lea bhurgeak piddapidd ditalo, toxench atam-i ghòddta.
30. Punn Povitr Pustok kitem sangta? "Gulam'-cheddvak ani tachea putak bhair ghal; kiteak svotontr bailechea puta borabôr gulam'-cheddvachea putak daizant vantto ascho na."
31. Mhonnttôch, bhavam-bhoinnimnô, ami gulam'-cheddvachim bhurgim nhoi, punn svôtontr bailechim.
