1. Uprant, chovda vorsamnim, Barnabasa borabôr ani Titak-ui sangata gheun, hanv novean Jeruzaleak choddun gelom.
2. Devan mhaka oxem kollit kelem dekhun hanv thoim gelom; ani videxiam modem hanv porgôttit ailam tem Xubhvortoman hanvem fuddariam mukhar khasgi boskent ghalem; kiteak mhollear mhozo atancho ani adlo vavr nirfôll zal'lo mhaka naka aslo.
3. Tednam, mhojea sangata aslolea Titak porian, to Grik zaun-ui, sunôt korunk konnem boll kelem na.
4. Tôri thodde bhav amchê modem ghusle; Jezu Kristacher bhavarth dovrun ji amkam svotontrtai mell'llea, ti kaddun amkam novean gulamponnant uddounk tanchem mon aslem.
5. Punn tumkam porgôtt kel'lea Xubhvortomanachem sot surokxit rakhun dovôrchê khatir, tanchê mukhar ami ek khinn-bhôr porian man bagaunk na.
6. Thoim manan lekhlole fuddari asle(hachê adim te khõichea panvddear asle te mhaka poddonk na, kiteak Dev mon'xank tanchea tondda pormannem lekhi-na); tôr hea manan lekhlolea fuddariamnim hanvem kitench bodôlchem mhonn koslich suchnna mhaka korunk na.
7. Urfattim, sunôt-kel'leank Xubhvortoman porgôttchem kam Devan Pedruchê adhin kelam toxench, sunôt korunk nasloleank tem Xubhvortoman porgôtt korchem kam Devan mhojê adhin kelam mhonn tãnnim vollkhun ghetlem.
8. Kiteak, khorench, Zannem Pedruk Judevancho Dhormdut kela, teach Devan mhaka videxiancho Dhormdut korun dhaddla.
9. Jakob, Kefas ani Juanv, hankam Povitr-Sobheche khambe mhonn lekhtalim; tôr heach mon'xamnim, Devan mhaka dil'lem dennem manun gheun, Barnabasak ani mhaka bhagidarponnachi khunna koxi aplo uzvo hat dilo: hê khunnê voilean ami videxiam vatten ani tãnnim Judevam vatten vechem mhonn amchi koblat zali.
10. Goribancho mat ugddas korunk tãnnim amchê lagim maglem; tôr tench hanv zotnaien korit ailam.
11. Punn Kefas Antiokiek ailo tednam hanvem taka sobhêmazar virôdh kelo, kiteak mhollear tachi chal sarki vankddi asli.
12. Karonn Jakoba thaun ailole kãi monis thoim pavchê adim to videxi bhavam-bhoinnim borabôr jevtalo; punn te ietôch, sunôt kel'lea hea bhavank bhieun, to ilo-ilo pattim sorlo ani videxi bhavam-bhoinnim borabôr jevpachem tannem sôddlem.
13. Ani heram Judev bhavarthiamnim tachea ddhongeponnachi oxi dêkh ghetli, ki Barnabas porian tankam lagun teach ddhongeponnachê vatten oddon gelo.
14. Punn Xubhvôrtomanachea sotachê vatten te nitt-sarke cholonant mhonn polletôch, hanvem soglleam hujir Kefasak mhollem: "Tum êk Judêv, tôri Judevanchi chal sôddun videxiam bhaxen tum jietai. Oxem zalear, videxiank Judevanchi chal pallunk lavunk sôdtai tem koxem?"
15. Zolman ami Judev, patki videxiantle nhoi ami.
16. Tôripunn hem ami zannonv: Somurt formaita tim kamam korun nhoi, punn Jezu Kristacher bhavarth dovrun ki khõichim-i mon'xam Devak manovlolim zatat. Mhonnttôch, Somurt formaita tim kamam korun nhoi punn Jezu Kristacher bhavarth dovrun Devak manovlolim zaunchê khatir, ami-i Jezu Kristacher bhavarth dovôrtanv, kiteak mhollear Somurtin formailolea kamam vorvim konnankuch Dev Apnnak manovlolim korcho na.
17. Punn Kristak ami bhavarthan ekvottlear Dev amkam Apnnak manovlolim korta mhonn ami patietanv dekhun, videxiam bhaxenuch ami patki mhonn sangchem zalear, khud Krist amkam patki bhesant ghalpachem karonn zalo, oxem-i sangchem? Na ki na!
18. Jem hanvem môddun uddoilolem, tench hanv novean bandunk laglom zalear, hanvem tem môddun vaitt kelam mhonn dakhoitam.
19. Devachê khuxê pormannem jieunchê pasot, khud Somurti vôrvim hanv tika melom, mhonngê Somurtik mhojer anink odhikar na. Krista borabôr hanv khursar marlolo asam;
20. hanv atam jietam to hanv nhoi; tôr Krist mhojê thaim jieta; Mhojea osokt mon'xa-soimbant hanv atam jietam tem jivit koslem tem sangtam: mhozo môg kela ani mhojê khatir Apnnakuch somorpun dila tea Devachea Putacher bhavarth dovrun hanv jietam.
21. Devachê doiallaiechem dennem hanv sôddun dina; kiteak Somurti udexim Dev mon'xank Apnnak manovlolim korta zalear, Krist funkott melo-so zalo.
