1. Dhoniamnô, mannsugê ani nitipormannem tumchea gulamank vagoiat. Tumkam-i sorgar êk Dhoni asa mhonn ugddas dhôrat.
2. Magnneant thir ravat, ani tumchim prarthonam kortana zagrut ravat ani Devak dhinvasat.
3. Amchê-i pasot magat; Kristacho gutt ukto korun Devacho sondêx porgôttunk Devanuch mhaka bori sondi diunchi mhonn magat: heach pasot hanv atam bondkhonnint asam.
4. Hanvem to sondêx favo tê bhaxen spôxtt porgôtt korcho mhonn magat.
5. Tumkam mellta tê dôr-êk sondicho boro upeôg korun, amchea bhavarthachim nhoi tea mon'xam sorim xanneponnan vagat.
6. Tumchem ulovop sodam godd ani mittan ruchichem kel'lea sarkem zaum-di. Teach borabor zonn ekleak favo toslo zobab diunk zanno zaiat.
7. Tikikus, mhozo opurbaiecho bhav, visvaxi adari ani mhojea vangdda Somiacho sevôk, mhoji soglli khobor tumkam ditolo.
8. Heach pasot, tumchea kallzank dhir diunk, hanv taka mud'dom tumchê-xim dhaddtam.
9. Tachê borabôr ietolo Onesimus, tumchêch sobhentlo visvaxi ani mogacho bhav. Hangachi soglli khobor te tumkam ditole.
10. Mhojê borabôr bondkhonnint asa to Aristarkus tumkam noman korta. Tosoch Marku, Barabasacho bapol-bhav. Tumchê vatten to pavot zalear, taka koso boro ieukar diuncho, tem hanvem tumkam adim sanglam.
11. Jezu Justus apunn-ui tumkam nomoskar korta. Amcho bhavarth dhôrlo tea Judevam modle he teguch zann Devachea Rajea khatir mhojê borabôr vavurtat, ani tãnnim mhaka khub adar dila.
12. Tumchêch sobhentlo Epafrasui tumkam noman korta. Ho Jezu Kristacho sevôk tumcho zaito husko korta, ani tumi sopurnnaien ani thirponnan Devachi khuxi korchi mhonn ani oxem tumchea apovnneak tumi visvaxi ravchim mhonn sodam tumchê pasot to magnnem korta.
13. Tumchê khatir ani Laodiseia ani Hierapolis nograntlea loka pasot to kitlo bhar gheun vavurta, hachi hanvuch govai ditam.
14. Luk, amcho priticho vôiz, ani Demas-ui tumkam noman kortat.
15. Laodiseia nograntlea sogllea bhavam-bhoinnink hanvem vicharlam mhonn sangat; toxench Ninfek ani tichea ghorant zomta tê Povitr-Sobhek.
16. Tumi hem potr vachlea uprant Laodiseiantlê Povitr sobhek-ui tem vachunk dhaddat. Têch bhaxen Laodiseiantlim bhav-bhoinn tumkam dhaddtolim tem potr tumi-i vachun kaddat.
17. Ani Arkipusak oxem sangat: "Somian tuka dilam tem kam' sompounk soglli fikir ghe."
18. Mhojeach hatan hem nimannem noman boroitam- PAULU. Hanv bondkhonnint asam mhonn ugddas dhôrat. Devachi doiallai tumchê sovem asum.
