1. Paulu, Devachê khuxen Jezu Kristacho Dhormdut, ani amcho bhav Timot
2. Kolos xarantlea bhoktank, Krista sovem amchea visvaxi bhavam-bhoinnink, noman kortat. Deva amchea Bapachi doiallai ani xanti tumchê sovem asum.
3. Amchea magnneamnim tumchê khatir Devak, amchea Somia Jezu Kristachea Bapak, ami sodanch dhinvastanv.
4. Kiteak Jezu Kristacher tumi bhavarth dovorla mhonn ani sogllea bhoktancho tumkam môg asa mhonn amkam khobor pavlea.
5. Sorgar tumkam bhorvanso dovorlolo asa tachê thaun to bhavarth ani môg nipzotat. Sotacho nirôp, mhonngê Xubhvortoman, tumkam porgôtt zalo tednam, hea bhorvanxeachi khobor tumi aikoli.
6. Hem Xubhvortoman ak'khea sonvsarak porgôtt zait veta. Tumchê sovem ghòddlem toxem, sogllê kodden follam diun tem vistarot veta; Devachem dennem tumi vollkhun ghetlem ani tachi sarki somzonni tumkam mell'lli, tea disa thaun tumchê modem oxem ghoddot ailam.
7. Hem tumkam xikoilam Epafrasan: to Xubhvortomanacho mhozo mogacho vangddi-chakôr ani amchea nanvan tumchê modem visvaxiponnan vavr korpi Kristacho sevôk.
8. Povitr Atmeachea dennean tumchê modem vosta tea mogachi khobor tannench amkam dilea.
9. Hea pasot, tumchi khobor ami aikolea tethun thaun ami sodanch tumchê khatir magnnem kortanv, ani Deva lagim magtanv tem hem: purnn zannvaien ani Povitr Atmo dita tê purnn somjikaien Devachê khuxechi poripurnn vollokh tumi gheunk pavum.
10. Oxem Somiak favo ani soglleanch vattamnim Taka manovta toslem tumchem jivit zatolem, ani sogllea jin'sachim borea kornnianchim follam tumi ditoleat, ani Devachê zannvaient tumi vaddon vetoleat.
11. Tumi sõsnnikaien ani mhatmeponnan cholunk, Aplê mhoimechea bollan Dev tumkam ghott kortolo.
12. Bapak dhinvasat anondan! Tannem tumkam bhoktam vangdda uzvadda-daiz favo kelam.
13. Kallokhachê razvôttkentli Tannench amkam suttka dili, Aplea mogachea Putachea rajeant amkam bhitôr kaddlim.
14. Tachê sovem amkam mell'lli amchi suttka, patkam-mafi:
15. Disonaslolea Devacho Jezu khoro jivo Rupkar, rochnnam modlo To Malgoddo!
16. Sorgar prithver soglleô rochnna, distat ani disonant teô, konn-ui teô zaum: raza, pordhan, odhikari, odhipoti Tachêch vorvim rochun aileat. Asa tem sorv Tachê vorvim ani Tachêch khatir rochlam.
17. Khõichich rochnna rochchê adim To vortota, To vortota. Sogllea rochnnank ektthaim korun Apunn eklo samball'n dhôrta.
18. Aplê Kuddichem To Mostok: Povitr Sobha hi Tachi Kudd. To tichea Jivitachi Zhôr, mel'leam modlo To Malgoddo, sogttant Prothom', sogttant Poilo!
19. Dev-soimbachi sorv sopurnnai Tachea mon'xasoimbant aschi, oxem Devak borem dislem.
20. Sorgar prithver asa titlem Apnna lagim sondhan korun Tachêch vôrvim ektthaim korchem, Tannench khursar vikrailolea rogta vorvim xanti korchi Devachi hich zali khuxi!
21. Eka vellar tumchim khottim kortubam tumchêm vaitt mon dakhoitalim: tankam lagun tumi Deva thaun koddsorlolim asleat, Tachim dusmanam zal'leat.
22. Punn atam, Devan tumkam, Tachea Putan Aplê vinaxi kuddint bhôglolea mornna vorvim, sondhan korun portun Aplê vengent ghetleant ani oxem Tannem Apnna mukhar tumkam povitr, nixkollonk ani niropradhi ubim korun dovorleant.
23. Atam tumi bhavarthachê buniadir thir ani ghôtt ravat. Xubhvortoman manun gheun tumkam mell'lla to bhorvanso tumi halunk ddonvddolunk dium nakat. Hem Xubhvortoman mollba khala aslolea sogllea mon'xam modem porgôtt zalam, ani hanv Paulu tacho sevôk zalam.
24. Tumchê khatir hanv atam koxtt sõstam te khuxalkaien sõstam, ani hê bhaxen jem Kristachea koxttank kitem unnem asa, tachem map Tachê Kuddi khatir, mhonngê Povitr-Sobhê khatir, hanv mhojêch kuddint bhôrun haddtam.
25. Aplê ievzonnê pormannem Devan mhaka Povitr-Sobhecho chakôr kelo ani Aplo sondêx purnnponnim tumkam porgôtt korchi zobabdari Tannem mhojê adhin keli.
26. Ho sondêx kallam-iuganchea ani mon'xakullachea orombak thaun Devan lipoun dovorlolo gutt, punn atam Tannem Apleam bhoktank to dokhôl kela.
27. To tankam ukto korunk Devacho hetu ho aslo: ki hea mhoimêbhorit guttacho porzôll sogllea videxeam modem vistaron vecho asa mhonn tankam kollon ieunchem. Ho gutt mhollear tumchê sovem asa to Krist, tumchê mhoimecho bhorvanso.
28. Hea Kristak ami porgôtt'tanv ani sogllê zannvaien Jezu Krista sovem sogllim sopurnn zaunchê khatir, sogllea mon'xank ami xiddkaitanv ani xikoitanv.
29. Heach khatir mhojê bhitôr vavurtolea Kristachea xoktivont bollan hanv ghas gheun vavurtam ani zhuztam.
