1. Krista borabôr Devan tumkam punorjivont keleant mhonnttôch, sorginchea vostunche zaum-di tumche otrek: thoim sorgar Krist Devachea uzvea hatak boslolo asa.
2. Tumchem dhean-mon sorginchea vostuncher asum-di, sonvsarantlea vostuncher nhoi;
3. karonn tumi meleant ani tumchem jivit Krista borabôr Deva sovem liplolem asa.
4. Tumchem jivit mhollear Krist, ani To dixtti poddtolo tednam, tumi-i Tachê borabôr dixtti poddtoleat ani Tachê mhoiment tumkam vantto melltolo.
5. Dekhun tumchea soimbant asat te sonvsari anvdde marun uddoiat: pozoddponn, mhelleponn, kamchar, khotteô vondovnniô, ani ti mannsugê-bhaili girestkaiechi axa hi axa khorench mhollear kud'dea devanchi puza.
6. Oslea vostunk lagun, Devachem aikonant tancher Tacho krôdh denvun ieta.
7. Ani tanchê modem tumi jietaleat tednam, tumchem-i jivit toslench aslem.
8. Punn atam hem sogllem tumi sôddun diunkuch zai: rag, krôdh ani vikottai; jastiô ani pozddeô khobrô tumchea tonddantleô kodinch bhair sorcheô nhoi;
9. ekamekak kodinch fotti marum nakat, kiteak tumchem pornnem patki soimb ani tacheô chali sôddun, tumi novea mon'xacho akar ghetla.
10. Apli purnn vollokh mello porian toch Rochnnar hea novea mon'xak odik-odik Aplea sarkeacho novo korit asa.
11. Hantum anink Grik ani Judêv mhonn na, sunôt kel'lo ani sunôt na-kel'lo mhonn na, porko ani zonglli monis mhonn na, gulam' ani svotontr monis mhonn na. Asa to ekloch Krist soglleam sovem Toch!
12. Tumi Devan vinchun kaddlolim, povitr kel'lim ani Tachê opurbaiechim: dekhun tumi doiall-movall kallzachim, bholim, khaltim, dulob ani vhôdd sõsnnikaiechim mon'xam zaiat.
13. Dusreacher garannem korunk nimit aslear, tumi ekamekak sõsunk zai ani bhôgsunk zai. Somian tumkam bhôgxileant, toxench tumi-i ekamekak bhôgsat.
14. Hea sogllea sugunnancho mukutt koso, pritimôg tumchê modem vôsum-di, kiteak tachê vôrvim sogllea sugunnancho sopurnn ekvôtt zata.
15. Êkuch Kudd ghoddun Krist dita ti xanti bhôgunk Devan tumkam apoileant; tôr hi xanti dolleam mukhar dovrun tumchem jivit choloiat ani tich zaum tumchem inam'! Ani Devak sodam dhinvaxit ravat.
16. Kristacho sondêx subhamponnan tumchea kallzamnim tthikann korum. Sogllê zannvaien ekamekak xikoiat ani budh diat. Tumchim kallzam dhinvasan bhoron, stotramnim, gitamnim ani Povitr Atmo upzoita tea gaionamnim Devachi vakhann'nni korat.
17. Tumi mhonnttat ani kortat titlem-i Somia Jezuchea nanvan korat ani Tachê vôrvim Devak, amchea Bapak, argam diat.
18. Potinnimnô, Somiachea ekvottant asloleank sobta toxem tumchea potinnk khalteô ravat.
19. Potimnô, tumchea potinnincho môg korat ani tanchê thaim khoraien vagum nakat.
20. Bhurgeamnô, sogttant tumchea avoi-bapaik khaltim ravat: hem Somiak manta.
21. Avoi-bapaiamnô, tumchea bhurgeank tiddkaum nakat, na zalear tanchem mon mòddtolem.
22. Gulamamnô, tumchea sonvsarantlea dhoniank sogttant khaltim ravat: tanchi xabaski zôddchea monan fokot tancho dollo tumcher asa tednam nhoi, punn sadhea kallzan Somiak man diunchê khatir.
23. Tumi kortat titlem-i sogllea kallzan korat, mon'xam khatir nhoi punn Somia khatir.
24. Mozuri koxi tumkam dovorlolem daiz Somi tumkam ditolo mhonn ugddas dhôrat. Kiteak, khorench mhollear, tumi chakri kortat ti Kristachi, amchea Somiachi.
25. Peleak vaitt korta taka aplea vaitt kortubank favô ti khast melltoli. Kiteak Dev mon'xachem tondd pollena
