1. Tumchê khatir, toxench Laodiseiantlea loka pasot ani mhaka rup-rup kodinch polleunk na tea khub-khub zannam khatir hanv koso zhuztam, tem tumi zanna zal'lim mhaka zai.
2. Ani tem kitea pasot? Tanchem kalljidarponn vaddounchê khatir, ekamekachea pritimogant tankam thir korchê khatir ani Devachea guttachi soglli girestkai vollkhun tachi sopurnn somzonni tankam mellchê pasot.
3. Hea Krista sovem xanneponnachim ani zannvaiechim sogllim bhanddaram liplolim asat.
4. Bhulovpachea punn polkea vivadamnim konnench tumkam fosoun noiê mhonn hem hanv tumkam sangtam.
5. Kuddin tumchê thaun pois asun-ui, monan tumchea sangata hanv asam. Tumchi xist polleun ani Kristacher tumcho bhavarth kitlo ghôtt asa to vollkhun, mhaka anond bhògta.
6. Jezu Kristak tumcho Somi mhonn tumi manun ghetla mhonnttôch, Tachea ekvottant jieiat.
7. Tumchim pallam Tachê bhitôr khôl-khôl riglolim asum-di. Tumchem jivit Tacher bandun haddat, ani, tumkam xikoilam toxem, tumchea bhavarthant odik ghott zaiat. Ani dhinvasnnen bhoron ieum-di tumchim kallzam.
8. Mon'xanchea polkea xanneponnan tumkam fosoun, konnench tumkam aplea tabeant korina zaunk chotur ravat. Oslem xanneponn mon'xam thaun tumkam pavlolea xikovnnanchi vatt dakhoita zait, vô tem tumkam srixtti choloitat tea odhikarianchea nemanchea margar ghaltat zait, punn tem Kristachi zannvai nhoi.
9. Kiteak Tachea mon'xasoimbant Devponnachi soglli poripurnntai asa,
10. ani Tachê sovem tumi-I poripurnntaiek pavleant. Hem monant dhôrat: sogllea Odhikarianchem ani Odhipotinnchem Toch Mostok.
11. Tachêch sovem tumchi sunôt kelea: hi sunôt mon'xachea hatan kel'li nhoi. Kristan sthaplolê hê sunôtin tumchem patki soimb sarkench kaddun uddoilam.
12. Tumkam Povitr-Snan dilam tednam, tumkam Tachea vangdda nikhipilim, ani teach Povitr-Snana vorvim tumkam Tachea vangdda punorjivônt kelim, kiteak Taka mel'leantlo punorjivont kelo tea Devachê podvecher tumi bhavarth dovorlo.
13. Tumchea opradhank lagun ani sunôt korunk naslolê tumchê kuddi pasot tumi mel'leant; punn atam, sogllea opradhanchem bhogsonnem diun, Devan tumkam Tachea vangdda punorjivont keleant.
14. Somurtichea kaideam-nemam pasot amcher add aslem tem rinnachem lêkh-potr Tannem kaddun uddoilem ani tem khursar khillaun tacho nas kelo.
15. Oxem Tannem Odhikarianchi ani Odhipotinnchi podvi kaddun ghetli, ani, koidi koxe Aplea zoitachea porivarant tankam vhorun, sogllea rochnnam mukhar tankam firoile.
16. Tumchea khannam-pinneam vixim, toxench utsovanchê, punovanchê, ani sonvaranchê babtint konnench tumkam nem-kaide ghalche nhoi.
17. Heô soglleô vôstu fuddarak ieuncheô asleô tea vostunchi savlli; sodam togpachem sot mhollear ekloch Krist!
18. Apleach vadean khaltikaiechem rup ghetat ani devdutank bhoztat, ani apnnank dorxonam gheunk sôdtat toslea mon'xam pattlean vochun, tumkam dovorlolem inam' hogddaum nakat; oslim mon'xam aplem mon'xa-soimbachem chintop dhôrun gorvan bhòrleant.
19. Tim Mostokak ekvôttlolim nant. Hea Mostoka-thaun ak'khi kudd sandheam ani gotram udexim aplem posonn gheta, ani, oxi ekvottant samball'loli, Devak zai tê bhaxen vaddot veta.
20. Krista borabôr morun srixtti choloitat tea odhikarianchea tabeantlim tumi mekllim zaleant; oxem zalear, ozun hea sonvsarachim zal'lê porim kiteak jietat tumi ani tache nem kiteak manun ghetat?
21. "Haka hat lavum naka", "tem dusrem chakum naka", "tem tisrem sanspum naka":
22. kosle nem' he? Vaprun ibadd zatat toslea vostum vixim mon'xanchê zannvaien dil'leô adnia ani xikovnnô!
23. Tankam bhailean zannvaiecho rông asot, punn hi soglli polki puza, ôrth-nasloli khaltikai, map-nasloli kuddichi donddvônn; punn patki mon'xa-soimbacheô vondovnniô domaunk osle nem' kiteakuch upkaronant.
