1. Rogtant buddlolea, fottimnim revoddlolea, luttichea mhalan girest zal'lea, ani hispa-bhaileô choriô kel'lea xarachem kotta kotta!
2. Aikat chabukancho koddkôdd, chakancho khoddkhoddatt! Nettan dhanvtat ghodde, goddgoddtat roth
3. ghuri ghalta ghoddesvari, zhogzhogtat torvari, chokchoktat bhale, zokhmianchi zalea ras, mel'leanchi zalea gordi! Pretancho hixôbuch na; pretank adllun aptton poddtat!
4. Xindôll bailechea hispa-bhailea pozoddponnacho porinnam ho! Tê sobit sundoren, tê chotur ghaddinnin, aplê xindollken raxttrank viktim ghetlim, ani aplea montramnim kullank gulamam kelim.
5. Ho polle, tujer Hanv tiddlolo asam- uloita Sorvsoktivont Sorvespor! Hanv tujem kapodd tujea tondda porian ubartolom ani raxttrank tujem vinglleponn uktem kortolom, rajeank tuji loz dakhoitolom.
6. Tujer mhêll xevttun martolom, tuka lojek ghaltolom ani soglleam hujir tuka kennnniancho mhal kortolom.
7. Tedna tujer nodor ghaltat titlim-i tujê thaun pois vochun mhonnttolim: 'Ninevehchem nisontton zalem!' Konn tori tichê khatir rudon korit? Tuka buzvonn divpi Mhaka khoim melltit?
8. No-Amona poros tum odik borem kai? Tem nodim modem bandlolem xar aslem, tachem kott mhollear somdir, udkam tacho burinz!
9. Ethiopia ani Ejipt taka map-mezop nastana boll ditalim. Tachê foujen tasle Putkar ani Libiekar.
10. Tori taka-i pordesant ani gulamponnant vochunk poddlem, tachea bhurgeam-ballanche dôr-eka nakear apttun-dhôpttun kuddke kele; tachea kullivont mon'xancher sorti ghaleô, tachea sogllea vhodd-vhodd mon'xank khoddeam- sankllimnim bandle.
11. Tum-i bebdem zatoleim ani lipun bhonvtoleim; tujea dusmanachea hatant poddona zaunk tuka-i asro sodunk poddtolo.
12. Sogllim tujim durgam uksar piklolim follam aslolea anjiranchea zhaddam sarkim: tim haloina fuddem khaunk ravtoleachea tonddant poddtat.
13. Tujea lokacher nodor mar: tumi sogllim mellun ek bailanchem raxttr! Tujea desache darvontte tujea dusmanank sarke ukte asat; tanche addambe ujean lasun uddoileat!
14. Tuka veddho ghaltole tea kallak udok santthoun dovor, tuje kil'le ghôtt kôr! Rebant rav, mati kaloi, vittancho khôrn sarko kôr!
15. Thoim uzo tuzo bhosm kortolo, torvar tuka katrun uddoitoli. Tollam bhaxen puskoll zaiat, pachvea tollam itlim zaiat,
16. (a)mollbachea noketram poros chodd tuje veapari zaum!
17. (a)Tuje kil'leanche rakhonndar tollam porim ani tuje foujê-odhikari tollanchea biream sarke! Thonddi poddta tedna, toll durgancher bostat; suria udeta tedna, (16b)te pakttam vistartat ani uddun vetat, (17b)uddun pois-pois vetat, khoim tem konn nokllo.
18. Kotta-kotta! Assiriechea raza, tuje gonvlli nhidun poddleat, tuje dhiradik monis sust nhidleat; tuji porza dongrancher zollim-mollim ximpoddlea ani tankam zoma korunk konn na.
19. Tujea ghaiak vokhod na; tujea dukhapotik pekovnni na. Tuji khobor aikotat tim sogllim tuzo sotianas zalo mhonnun talliô pêtt'tat. Tôr tujê kotthôr nixtturaiecho ghans chakunk naslolo konn tori asot?
