1. Judak Polle! Xubh khobor gheun ietolea sondexkarache pãi porvotancher distat polle! 'Xanti!' oxem to porgôtt korta. Juda, tujea utsovancho somarombh kôr, tujeô angovnnô pall, kiteak Belial anink kodinch tujê modlean vecho na. Tachem samkench nisontton zalem.
2. Kil'lea-kottanchi rakhon korun, rosteacher nodor dovrun, aplim avoronnam ghôtt bandun, aplem mottem boll zomoun, nisontton korpi tujea angar aila!
3. (Kiteak, luttnnaramnim tankam luttlolim, ani tanchea dak-velinche fantte tôddun uddoilole astanam-i, Sorvesporan Jakobachê dak-vêlik, hôi Israelachê dak-vêlik, novean jiv dilo!)
4. Tachea soinikanche dhal tambddea rongache keleat, te kirmiji-lal vostram nhesleat; zhuzak toiar zatat mhonnosôr tanchea rothanchem tikhem chokchokta.
5. Ghoddesvar zhuz suru korunk huthute zaleat, rosteancher roth dhanv martat ani choukancher ekamekak adolltat; te zolltea uzvadda sarke distat, zhoglannea porim hevtten-tevtten dhanvtat.
6. Ninevehcho raza aplea sordarank ek-ekleachem nanv gheun apoita. Fuddem vetam-vetam te addkholltat. Te kotta-xim dhanvim dhanvim vetat, ani kott rakhunk dhal dhôrun toiar ravtat.
7. Nodicheô mansô ugôddtat; razvaddeant sogllo kampero.
8. Sobitaiek koidi keli ani ubarun vheli; ticheô chakornnim parvinnim bhaxen roddtat ani aplim hodd'ddim boddoitat.
9. Nineveh ek tollem koxem zalam; tachim udkam vhanvon vetat. Thambat! Thambat! Punn konnuch porton iena.
10. Rupem luttat! Bhangar luttat!' Bhanddar sompoch na, sogllê torechea moladik vostuncheô raxi thoim asat!
11. Tichi zali dêsvatt, zalo sotianas, zalem ghorttan! Kallzam fafsotat, dhompram gollgolltat, konnacheach jivant jiv na, ani soglleanchea tonddar kallôkh.
12. Khoim asa atam xinvanchi dhôl? Khoim asa xinvanchea pileanchi ghôl? Thoim xinv ani xinvinn aplea porank gheun konnachich bhirant nastana chorvak vetalim.
13. Thoim xinv kuddke-kuddke korun aplea pileank jevonn ditalo zonavorank pilltalo; thoim to apleô ghôli xikaren ani apleô dholi fall'lolea masan bhôrtalo. 14. Polle, Hanv tujer add asam uloita to Sorvsoktivont Sorvespor! Hanv tujea rothancho voir choddun veta toslo dhunvôr kortolom, ani tujea pileank torvar girastoli, prithver luttlãi titlem Hanv kaddun ghetolom, ani tujea niropiancho tallo anink kodinch aikum ieunchona.
