1. Nineveh vixim hem bhakit.Elkoshantlea Nahumachea dorxonachem hem pustok.
2. Aleph Sorvespor êk premaxecho ani sudd ghevpi Dev, Sorvespor farikponn ghevpi ani ragabhorit zavpi; Sorvespor Aplea virodhiancho sudd gheta ani Aplea dusmanancho rag samballta.
3. Sorvespor ragak mond, punn vhôdd podvecho; vaittak khast lailea bogor To ravona. Bet Vadollantlean ani moddantlean To cholun ieta, ani kupam mhollear Tacheam pãiamnim ubarloli dhul'l.
4. Gimel Doriak To dobkaita ani sukoita ani soglleô nodi sukoun uddoita. Dalet Bashan ani Karmel korpon vetat ani Lebanonachi vonospôt bavon veta.
5. He Porvot Tachê mukhar thorthortat, dongurliô girgirtat; Waw Tachê fuddem prithum gollgollta, sonvsar ani tantum jietat titlim-i kamptat.
6. Zain Tachea ragachea kinva mukhar konn ubo ravot? Tachea zolltea krodhak konn fuddo korit? Het Ujea sarko Tacho rag zollot posrot veta, ani Tachê somôr khoddpam futt'tat.
7. Tet Sorvespor khorench boro, akantachea vellar To kil'lea sarko asro; Yod Apnnak xeronna ietoleank To rakhta-samballta.
8. Punn hunvarachea lotta bhaxen Kaph Aplea virodhiancho To sarkoch nas korta, ani kallôkh gheun Aplea dusmananchê fattik lagta.
9. Sorvespora add kitem mhonn ievjitat tumi? To Apunnuch tumcho nas kortolo. Tache virodhi dusrê pavtti anink utthonant.
10. Ghuspol'lea kantteanchea jhilkutta vori, sukea tonna sarke, te samkech lason vetole.
11. Assiriek Sorvesporacher add fituri haddpi konn-eklo, Belialacho budhvont, tujê thaun (Nineveh)upzola.
12. Judak Sorvespor oxem sangta: Zorui te bollixtt ani khub zann asat, torui tanchem soglleanchem Hanv nisontton kortolom ani te nanch zatole. Zorui Hanvem tumkam koxttailim, torui anink kodinch Hanv tumkam koxttauncho na.
13. Atam tumchê mani velem tachem zum' Hanv môddtolom ani tuka bandun dhôrtat teô sanklli Hanv tôddun uddoitolom.
14. Ninevehchea razak Tujê vixim Sorvesporan oso hukum ghala: Tujea nanvak anink daiji aschenant, Hanv tujea devanchea mondirantlean kud'dea devanchea kantoil'lea protimancho ani koddoil'lea murtincho nas kortolom; tuka êk fôndd toiar kortam, kiteak tujer xirap poddlolo asa!
