1. Polle, Mhaka êk vatt toiar korunk Mhozo niropi Mhojê mukhar pattoitolom. Ani zaka tumi sôdtat, to Sorvespor ovchituch Aplea Mondirant ietolo; hôi, jea korarachea dutak tumi gheunk axetat, to ietolo, oxem Sorvsoktivont Sorvespor mhonntta.
2. Tachea ienneachea Disak konn virôdh korunk xokta? To dixtti poddtolo tedna konnachean ubo ravunk zait? To xettichea agttea ani moddvollachea khara sarko zatolo.
3. Rupem nitoll ani nirbhel kortolea bhaxen to aplea asonar bostolo, Levichea putam-dhuvank to nirmoll kortolo, ani tankam bhangara ani rupea vori nirbhel kortolo, ani oxem tim promannikponnan aplim danam Sorvesporak bhettoitolim.
4. Zoxem magam, adlea kallar, zatalem, toxem Judachi ani Jerusaleachi bhettovnni Sorvesporak mandtoli.
5. Tumchi nit korunk Hanv tumchê sorxim ietolom; ani ghaddiancher add, pordvariancher add, ani lottik govai ditoleancher add Hanv rokddoch sakxi ditolom; toxench disvoddeak vavurtoleank, vidvank ani onath bhurgeank piddapidd ditat tancher add; ani porkea mon'xanche hok'k mostitat tancher add, ani Mhozo bhõi dhôrinant tancher add Hanv rokddoch sakxi ditolom - mhonntta Sorvsoktivont Sorvespor.
6. Na, Hanv Sorvespor bodòlna; ani tumi sodanch Jakobachim bhurgim, dekhun tumcho nas zauncho na!
7. Tumchea purvozanchea kallar thaun Mhoje nem' tumi sôddleat, te tumi pallunk nant. Mhojê-xim portun ieiat, ani Hanv tumchê-xim portun ietolom, mhonntta Sorvsoktivont Sorvespor. Punn tumi vichartat: "Kitem mhonn korun portun ieunchem ami?
8. Mon'xan Devak fottounk zait?" Tori punn tumi Mhaka fottounk sôdtat. Punn tumi vichartat: "Tuka ami koso mhonn fottoitanv tôr?" Dhavo vantto ani dôndd farik korinastana.
9. Tumi, ak'khi porza, Mhaka fottounk sôdtat mhonnun, tumcher xirap!
10. Mhojea ghorant orôv aschê khatir, sogllo dhavo-vantto kotthiê-kuddint raxik ghalat; magir Mhoji porikxa korun gheiat, mhonntta Sorvsoktivont Sorvespor: Hanv tumchê khatir sorgincheô man'sô ugddun subham' axirvad tumcher ôtina zalear polleiat.
11. Tumchê khatir, Hanv tollak tumchê zomnintlea utpon'nacho nas korunk diuncho na; ani tumchea molleamnim dakvelinchim follam pikachea vella adim ibadd zaunk Hanv diuncho na, mhonntta Sorvsoktivont Sorvespor.
12. Tedna sogllim raxttram tumkam subhagi mhonnttolim, kiteak tumi êk sontosacho dês zaunk pavtoleat.
13. Sorvespor mhonntta: Tumi Mhojê vixim khor vostu uloileat. Tori tumi mhonnttat: "Tujer add ami kitem mhollam?"
14. Tumi mhollam: "Sorvesporachi seva korun kosloch faido na; Tacheô adnia samballun vô Sorvsoktivont Sorvespora mukhar dukhest tondd gheun bhonvun kitem mellta amkam?
15. Khorench mhollear, gorvixtt mon'xank bhagi mhonnpacho atam vêll pavla; vaitt kortat tim sukh bhôgtat; tim Devachi porikxa kortat, tori koslich khast bhôginastana borim sutt'tat!" '
16. Tedna Sorvesporachem bhem dhôrtat tãnnim hachê vixim ekameka lagim bhasabhas keli, ani Sorvesporan tankam chit diun aikolim; ani jim konn Sorvesporachem bhem dhôrtat ani Tachea nanvak man-adôr ditat, tanchim nanvam ghalun Tachea fuddeant ek ugddasachem pustok boroun kaddlem.
17. Mhojem kherit mannkulem daiz ektthaim toiar korunk vetam tea disa, mhonntta Sorvsoktivont Sorvespor, tim Mhojinch zatolim, ani zoso êk monis apli seva kortolea putak doiallaien vagoita, toso Hanv tumkam doiallaien vagoitolom.
18. Tedna, promannik ani khottea mon'xa modem, Devachi seva korta ani Tachi seva korina tea mon'xa modem ontôr asa ti tumi novean polletoleat.
