1. Ani atam iadnikamnô, hi xiddkavnni tumkam:
2. Tumi ti aikonam zaxat, ani Mhojea nanvak mhoima diunk tumcho husko korina zaxat zalear, Sorvsoktivont Sorvespor mhonntta, tumcher xirap ghaltolom ani tumi ghaltat to axirvad Hanv xirap zai-so kortolom. Hanv khorench xirap ghaltolom, kiteak tumchê modlea konnakuch ho husko na.
3. Polle, Hanv tumcho bavllo môddtolom, ani tumchea tonddancher kochro uddoitolom tumchea dobajik utsovancho kochro - ani tachê borabôr tumkam-i Hanv zhaddun uddoitolom.
4. Levi kodde kel'lo korar Hanv samballtam mhonn tumi zanno zaunk hi adnia Hanvem tumkam dilea - mhonntta Sorvsoktivont Sorvespor.
5. Tachê kodde Hanvem kel'lo to korar jivitacho ani xanticho, ani him dennim Hanvem taka dil'lim. Tea bhair, to korar bhiddecho aslo, ani tannem Mhoji bhidda dhôrli ani Mhojea nanvacho taka bhõi aslo.
6. Tachea tonddant asli sotachi Somurt, ani tachea onttancher lobaddi mell'lli na. Xantin ani promannikponnan to Mhojê borabôr chol'lo ani zaiteank tannem khottea marga velim pois kaddlim.
7. Iadnikachea onttamnim zannvai samballunk zai, tachea tonddant mon'xamnim Somurt sôdunk zai, kiteak to mhollear Sorvsoktivont Sorvesporacho niropi.
8. Punn tumich vattê vele koddsorleat; ani zaitea zannank vatter poddunk tuminch tumchê xikovnnen addkhôll ghalea; Levicho Korar tumim moddun uddoila, mhonntta Sorvsoktivont Sorvespor.
9. Hea pasot, tumim Mhojeô vattô samballunk nant ani Somurti pormannem nit kortana tumim mon'xam modem ontôr kelea dekhun, atam Hanvem Mhojê pallien tumkam sogllê porjechea dolleam mukhar holke ani kikont korun sôddleat.
10. Amkam soglleank êk Bap asa, nhoi? Ekach Devan amkam rochleant, nhoi? Kiteak tôr ami ekamekacho ghat ghetanv ani oso amchea purvozancho korar bhoxttaitanv?
11. Judan visvas môddla; Israelant ani Jerusaleant kanttalleachem kortub kel'lem asa. Porkea devachê dhuvê kodde logn zaun Judan Sorvesporachea mogachem Tachem povitr-sthan bhoxttailam.
12. Oslo opman kortoleak, konn-ui to zaum, ani Sorvsoktivont Sorvesporak bhettovnniô orpunk to iet zalear-ui, Sorvespor Jakobachea tombuntlo bhair ghalum.
13. Anink-ui êk vost tumi kortat: Sorvesporachê vedicher tumi dukam golloitat. To tumchea danancher dolle laina ani tumchea hatantlim danam mandun ghena dekhun, tumi roddnnem ani vilap kortat.
14. Ani tumi vichartat: "To oxem kiteak korta?" Kiteak tujê ani tujea tornnattponnachê bailê modem kel'lea koraracho sakxi Sorvespor; zorui ti korara vorvim tuji sangatinn ani potin, tori tum tika ovisvaxi zalai.
15. Êkuch kudd ani jivacho êkuch svas asloli rochnna Tannem tankam korunk na? Kitea pasot? Sonsôt mellchê khatir. Ani ti êk kudd kitem sôdta? Devan dil'li sonsôt. Mhonnttôch tujeach jivacho samball kôr ani tujea tornnattponnachê bailek ovisvaxi zaum naka.
16. Logn-môddnneacho Hanv dvês dhôrtam, mhonntta Sorvespor, Israelacho Dev, ani apli darunnai zhubea ponda dhamptat tancho dvês kortam, mhonntta Sorvsoktivont Sorvespor. Mhonnttôch tumcheach jivak man diat, ani ovisvaxi zaum nakat.'
17. Tumchea utramnim tumi Sorvesporak ubgônn haddlea; tori tumi vichartat: "Ami koxi Taka ubgônn haddlea tôr?" "Vaitt kortat tim Sorvesporak mandtat; khorem mhollear, tanchê sovem Taka sontôs bhògta" vô "Niti-vont Dev khoim asa atam?" Oxem tumi mhonnttat tedna, tumi Taka ubgônn haddtat.
