1. Punn hem Jonasak ekdom vaitt dislem ani to tiddlo.
2. Ani tannem Sorvesporak magnnem korun mhollem: 'Aik, Sorvespora, oxem ghòddtolem mhonn hanvem, mhojea ganvant astana, Tuka sanglolem ki na? Tea pasot hanvem adim-fuddench Tarshishak pollun vochunk proitn kele. Tum doiall-movall kallzacho Dev mhonn hanv zanno aslom. Tum rokddo ragar zainãi, Tum subhamponnan visvaxi môg dakhoitai, ievjil'li xikxa Tum sôddun ditai.
3. Tor atam Sorvespora, hanv Tuje kodde magtam,mhozo jiv kadd, jivo urche bodlek hanv melear odik borem.'
4. Sorvesporan mhollem: 'Tum itlo ragar zatai tem borem mum?'
5. Tednam Jonas xarantlo bhair sorlo ani xarachê udentek tannem êk zago sôdun kaddlo; thoim tannem apnnak êk khomptti ghali, ani xarak kitem ghòddta tem polleunk tichê savllê ponda to boslo,
6. Tedna Sorvespora Devan Jonasachê kuxik taka savlli diunk ani tache tras lhov korunk ek enddelachem zhadd voir soro-xem kelem. Enddelachem zhadd polleun Jonas chôdd khuxi zalo.
7. Punn dusrea disa, fantear, Devan tea enddelachea zhaddak êk rontto lago-so kelo, ani oxem tem sukun gelem.
8. Uprant, dis udetôch, Devan udentê thaun êk khôr-koddok varo sutto-so kelo; ani Jonasachê toklek itlem vot laglem ki to jhintt marun poddlo ani moronn magun tannem mhollem: 'Jivo urchê poros hanv melear odik borem.'
9. Devan Jonasak mhollem: 'Enddelachea zhaddak lagun tum itlo tiddtai tem sarkem asa?.' Tannem zobab dilo: 'Hôi, ragar zaunk mhaka purtem karonn asa, itlo ragar ki morunk puro!'
10. Sorvesporan mhollem: 'Hea enddelachea zhadda pasot tunvem kãi koxtt korunk naim, na mhonn tem vaddounk naim; tem êkê rati bhitôr voir sorlem ani êkê rati bhitôr morun gelem; ani tori tachi tuka kallji asa.
11. Atam polle: Ninevehnt, tea vhoddlea xarant, gorvam-mon'zatinchi gozal korinastana, ekxem-vis hozaram-vôn lôk asa; tankam khõicho uzvo hat ani khõicho davo hat mhonn kollona; ani Mhaka hea xarachi kallji asunk favo na?'
