1. Sorvesporachem utor dusrê pavtti Jonasak ailem; Tannem mhollem:
2. Utth! tea vhoddlea Nineveh xarant voch, ani Hanv sangtolom to nirôp tankam porgôtt kôr.'
3. Mhonnttôch, Sorvesporachea utrak pallo diun, Jonas utthlo, ani Ninevehk gelo. Nineveh mhollear vhoddantlem vhodd xar aslem; itlem ki bhitôr sorun bhair sorpak tin dis lagtale.
4. Jonas xarant bhitôr sorlo ani eka disachi vatt tankun tannem oxem porgôtt kelem: 'Anink challisuch dis, ani Ninevehchem nisontton zatolem.'
5. Ani Ninevehchea lokan Devacher bhavarth dovorlo; tãnnim êk upas porgôtt kelo; vhodd-vhodd mon'xamnim toxench barik lokan sakafottean ang pangurlem.
6. Hi khobor Ninevehchea razak pavli tedna, to aplea xinvasona voilo denvlo, ani aplim vostram kaddun tannem-i sakafottean ang pangurlem, ani vochun to gobracher boslo.
7. Ani tannem oxi porgôttni keli, ani ti Ninevehnt xekan'xek sadoili: 'Razachea ani tachea kullvontanchea hukuman, mon'xamnim zaum, zonavoramnim zaum, gorvamnim vô xelliamnim zaum, kãich chakum noiê, kitench khaum noiê ani udok-ui pieum noiê.
8. Soglleamnim sakafottean ang pangurchem, ani vhoddlean Devak ulo marcho; zonn-eklean aplem vaitt jivit ani aplim zobordost kortubam sôddun diunchim.
9. Konachean sangum-iet? Dev ghoddiê Aplem mon bodlit, thôndd movall zait ani aplo zollto rag sôddun diit, ani oxem amcho nas zauncho na.'
10. Tãnnim vhoddê zotnaien aplem vaitt jivit sôddun dilam mhonn Devan pollelem. Tedna To thôndd movall zalo, ani jê xikxen Tannem tankam dhomkail'lim, ti Devan pois keli.
