1. Masllechea pottant-sun Jonasan Sorvesporak, aplea Devak, magnnem kelem. Tannem mhollem:
2. Mhojea dukhant-thaun hanvem Sorvesporak ulo marlo, ani Tannem mhaka zap dili; Patallachea pottant-thaun hanvem ulo marlo, ani Tunvem mhozo tallo aikoloi!
3. Tunvem mhaka doriachê khorik uddoiloi, somudrachea pottant fenkloi, hunvarachea udkamnim mhaka veddho ghalo, sogllim Tujim lharam ani osaddi mhojer choddlim.
4. Tedna hanvem chintlem: 'Tujê mukhailo Tunvem mhaka bhair ghaloi!' Tori Tujea povitr Mondiracher hanv novean dolle ghaltolom.
5. Mhojê bhonvtim udkam mhojea gollea porian choddun ailim,somudr mhaka buddounk pavla, doriantlim jhili-zhompam mhojem mathem revddaitat.
6. Porvotanchea mullam porian denvlam, patallant hanv buddun pavlam, ani tache addambe mhaka sasnnak bond korun dovortole. Punn na: Tunvem, Sorvespora mhojea Deva, mhaka jivo fonddantlo bhair kaddloi!
7. Mhozo jiv mhojê bhitôr virun vetalo tedna, hanvem Sorvesporacho ugddas kelo; ani mhojem magnnem Tujea povitr Mondirant Tujê-xim pavlem.
8. Jim konn kud'dea devank bhôztat, tim Visvaxi Môg sôddun ditat.
9. Punn hanv dhinvasnnechea gitamnim Tuka iôdn bhettoitolom. Jem hanvem angovnn korun bhasailam, tem hanv vopun ditolom! Sorvespora koddsun ieta soddvônn!
10. Ani Sorvespor masllê kodde uloilo ani tinnem Jonasak sukê zomnir ônkun uddoilo.
