1. Kiteak tea disamnim ani tea kallar, Judachi ani Jerusaleachi adli doulôt-girestkai Hanv tankam portun ditolom;
2. tedna sogllea raxttrank Hanv ektthaim kortolom ani tankam soglleank Jehosafatachea Falkeant vhorun pavoitolom; thoim Hanv tanchi mon'subi kortolom, kiteak tãnnim Mhojê porjek, Mhojea daiza Israelak, raxttram-raxttramnim ximpddaili ani Mhozo dês apnnam modem vanttun ghetlo.
3. Konnak Mhoji porza poddta ti polleunk, tãnnim sort ghali, xindôll bailô mellpa khatir tãnnim cheddeank vikun dile, pieunk soro mellchê pasot tim cheddvank vikunk pavlim.
4. Ani tumi, Tir and Sidon, ani sogllim tumi, Filistevkaranchea prantamnô, kiteak mhonn tumi oxem Mhaka kortat? Mhozo sudd gheunk sôdtat tumi? Tumi Mhozo sudd ghexat zalear, rokddoch, eka khinna bhitôr, tumcho sudd tumcheach mathear poddo-so kortolom.
5. Kiteak tumi Mhojem rupem ani bhangar kaddun vhelim, ani Mhojim moladik bhanddaram ubarun tumchea devllamnim dovorlim;
6. Judachea ani Jerusaleachea putam-dhuvank tanchea khaxa desachea ximam thaun pois pavounchê khatir, tumi tankam Grikank viklim,
7. Polleiat, tumi tankam vikun pavoileant teach zageam thaun Hanv tankam utthoitolom ani tumchim kortubam tumcheach mathear poddo-xim kortolom,
8. Tumchea putank ani dhuvank Judachea putam-dhuvank viktolom, ani him, aplê pallien, tankam Sabeikarank, hea poixilea raxttrak, viktolim. Uloila to Sorvespor!'
9. Raxttram modem oxem porgôtt korat: Zhuzak toiar zaiat! Dhiravont zhuzariank utthoiat! Sogllea tumchea soinikank gheun, cholat fuddem, akromonn korat!
10. Tumche nangor môddun torvari korat, ani tumcheô koitiô môddun bhale korat. Osoktan oxem mhonnchem: 'Hanv boro ghôtt asam!'
11. Bhonvtonnchea sogllea raxttramnô, vegim-vegim ieiat, thoim zoma zaiat! (Sorvespora,Tujea dhiravont soinikank sokla dhaddun di!)
12. Raxttram utthum ani Jehosafatachea Falkeant vochum. Kiteak bhonvtonnchea sorv raxttranchi thoim Hanv mon'subi korunk vetam.
13. Koiti laiat, kiteak pik toiar zalem; ieiat ani môllnnek lagat, kiteak kollombi bhòrloli asa; pipam bhoron òt'tat: itlem vhodd zalam tanchem noxtteponn!'
14. Urponjincher urponji Nirnnoiachea Falkeant! Kiteak Nirnnoiachea Falkeant Sorvesporacho Dis lagim pavlo!
15. Suria ani chondr kalle zaleat, noketrancho porzôll palovlo.
16. Siona thaun Sorvespor gorozta, Jerusalea thaun To ghoddghoddta; mollob ani prithum kamptat. Punn Aplê porjek Sorvespor asro zatolo, Israelkarank êk kil'lo.
17. Tedna Hanv Sorvespor tumcho Dev mhonn, ani Sionant, Mhojea povitr dongrar, Mhojem tthikann mhonn tumkam gomun ietolem. Tedna Jerusalem ek povitr sthan zatolem, porko lôk konnuch kednanch anik tem aplea tabeant korcho na.'
18. To Dis ietolo tedna, porvotam thaun novo soro vhanvun ietolo, ani dongrar thaun vhanvtolem dud, ani Judachea sogllea nodim vhallantlean udok vhanvot astolem. Devachea Mondirant-sun êk zhôr futt'toli ani babhullinchi khindd ximptoli.
19. Ejiptachem zatolem nisontton ani Edom zatolo oronnea sarko padd zago, kiteak tãnnim Judachea putam-dhuvank zobordosti keli, tanchem niropradhi rogot tãnnim tanchea desant vikrailem.
20. Punn Judant lôk ravtolo sodankal, ani Jerusaleant pinddkechê pinddkent!
21. Tanchea rogtacho Hanv sudd ghetolom ani khast lainastana konnakuch sôddcho na.' Ani Sorvespor Sionant Aplem tthikann korun astolo.
