1. Pethuelachea puta Joelak Sorvesporachem utor oxem ailem:
2. Hem aikat, malgoddeamnô; desant ravpiamnô, sogllim tumi kan diat! Oslem kitem tumchea kallar vô tumchea purvozanchea kallar ghòddlam zait?
3. Hê ghòddnnechi khobor tumchea bhurgeank sangat, ani tumchea bhurgeamnim ti aplea bhurgeank sangchi, ani tanchea bhurgeamnim fuddlê pinddkek ti sangum-di.
4. Jem kitem chabddavpê-kiddin sôddlem tem tollan khelem, jem kitem tollan sôddlem tem dhempean khelem, jem kitem dhempean sôddlem tem katorpê-kiddin khelem.
5. Utthat, bebdeamnô, ani roddat, portun portun soro pietoleamnô, vilap korat, kiteak novo soro tumchea tonddantlo kaddun vhelo.
6. Karonn eka bollixtt raxttran mhojea desacher akromonn kelam; hea raxttrachea lokacho hixôb na; tache dant xinvachea dantam sarke, ani xinvinniche koxe tache tonkall dant.
7. Mhoje dakam-molle tannem padd kele ani mhojea anjiranche barik-barik kuddke kele, ani tanchim sogllim panam ani sal kaddun te khande tãnnim sarke dhove korun sôddle.
8. Zoxi sakafottem ghalun êk ankvar hokol aplea tornnattponnachea novreacher rudon korta, toxim tumi rudon korat!
9. Sorvesporachea Mondirant dhaneacheô ani pinneancheô bhettovnniô anink vopinant. Iadnik, Sorvesporache muniari, dukh kortat.
10. Xetam padd zaleant, zomin dukh korta, kiteak dhano-gotto ibadd zala, novo soro mellona, zoitunachem tel sukun gelam.
11. Gonva ani zova khatir, xetkamtiamnô, mon môddun ogech ravat, dakam-molle vosoitoleamnô, vilap korat! Xetachea pikachem sogllench nuksann!
12. Dak-vêl sukun geli, anjiranchim zhaddam sarkim bavleant, ddallimb, khazur-madd, apolachem zhadd, xetam-molleantlim sogllim zhaddam sukun gelim. Ani mon'xam-i modlo sontôs ubun gelo.
13. Iadnikamnô, gonnan ang pangrun vilap korat. Vedichea sevokamnô, rudon korat! Mhojea Devachea sevokamnô, hanga ieiat, gonnan ang pangrun rat sarat. Karonn tumchea Devachea Mondirant dhaneachem orponn ani pinneachem orponn atam anink cholonant.
14. Êk upas formaiat, êk dobajik zomat bhôrun haddat, malgoddeank ani desant ravtolea somestank Sorvespora tumchea Devachea Ghorant ektthaim korat. Sorvesporak ulo marat!
15. Ai Saiba! Koslo dis ho! Sorvesporacho Dis lagim pavla. Sorvpodvedara thaun ghorttann koxem to ieta!
16. Amchea khud dolleam mukhailem jevonn kaddun vhelem. Ani tosoch amchea Devachea Ghorantlo ubun gelo sontôs ani anondache ul'las.
17. Matient diflleamnim biam kuslim; dhanneachim kottharam sôddun dileant, kodde moddon poddleat, kiteak pik sukun gelem.
18. Gorvam vhoddlean pinrgotat! Apnnank chorôv na mhonnun gorvanche hindd gondhollant poddleat! Menddranche hindd-ui hi khast bhôgtat.
19. Sorvespora, Tuka hanv ulo martam! Ujean oronneantlo chorôv lasun uddoila, xetam-molleamnim sogllim zhaddam agttean zollon geleant.
20. Ran'vott mon'zati porian khorxeun-khorxeun Tujê-xim ietat, kiteak udkache vhall sukleat ani oronneantlea chorvacho ujean bhosm kelo.
