1. Sionant menddrea-xing vazoiat, xing funkoun mhojea povitr dongrar sonkoxttachi xiddkavnni diat. Desant jietolea sogllea lokak kampero suttom-di, kiteak Sorvesporacho Dis ieuncho zalo! Ho polleiat, to lagim pavlo!
2. Kallokhacho ani andharacho Disto, kallea-kitt kupancho Dis! Zoxem fantem dongrancher ximpoddta, toso êk vorixtt ani bollixtt loskor ximpddon ieta: purvilea kalla thaun oxem kednanch ghoddlem na oslem disunk na, fuddarak-ui pinddkam-pinddkamnim oslem ghoddchench na.
3. Tanchê fuddlean uzo girasta, tanchê pattlean agttem sogllem lasun uddoita. Tanchê mukhar dês Eden bagê sarko, tanchê pattlean toch dês padd zal'lem oronnem. Kãich tanchea hatantlem suttchem-urchem na.
4. Ghoddeam sarke te distat, ani zhuzachea ghoddeam porim te veg-vegan dhanvun ietat.
5. Suklolem tonn lasun uddoita toslea korkortea ujeachea agttea bhaxen, zhuzak manddlolê bollixtt foujê sarke, rotham bhaxen goddgoddun dongrachea tenkxiam voilean uddiô marun te ietat.
6. Tanchê mukhar sogllo lôk akantan bhòrta, soglleanchim tonddam dhovsar zaleant.
7. Soinikam porim te nettan fuddem vetat; zhuzariam bhaxen te vonntincher choddtat;
8. ekamekak vatter adollnastana, zonn-eklo ap-aplê vatten nitt fuddem veta. Bann uddtana porian ap-aplo krom môddinastana te fuddem vetat toxe vetat.
9. Xaracher add te lotton poddtat; tanchea kottancher uddiô marun choddtat; ghorancher voir sortat, choram porim zonelantlean bhitôr sortat.
10. Tanchê mukhar dhôrn kampta; ontrall thorthorta. Suria ani chondrim kallim zatat, noketram aplo porzôll sanddtat. Aplê foujê mukhar Sorvespor Aplo tallo gazoita!
11. Khoreaninch vorixtt ani bollixtt Tachi fouz; Tachem utor ti pallta. Karonn bhov vorto ho Sorvesporacho Dis, ani ekdom bhirankull! Konnachean taka fuddo korunk zait?
12. Tôr atam -uloita to Sorvespor!-upas korun, rudon korun, vilapun, sogllea tumchea kallzan Mhojê-xim portun ieiat.'
13. Tumchim vostram nhoi, punn tumchim kallzam pinzat ani Sorvespora tumchea Deva-xim portun ieiat, kiteak To movall ani doiall, vhôdd sosnnikaiecho ani visvaxi mogan bhòrlolo; khast lailear porian To churchurta.
14. To tumchê-xim portun vollot, tumcho Taka kollvollo iet ani Aplea pattlean axirvad dovrit vô na ani eka pinneachi bhettovnni tumchean somorpunk zait vô na hem konn zanno?
15. Sionant menddrea-xing vazoiat! Êk povitr upas formaiat, êk dobajik zomat bhôrun haddat,
16. Porjek ektthaim korat; êk povitr sobha bhôrat. Malgoddeank zoma korat, bhurgeank ektthaim korat, dudachea ballank porian. Novrean apli kudd sôddchi ani hoklen apli lognachi baz.
17. Angnna ani vedi modem iadnikamnim, Sorvesporachea muniariamnim, vilap ani rudon korun mhonnchem: 'Sorvespora,Tujê porjek bhogôs! Tujem daiz kenddnniancho mhal zaunk nirmum naka, raxttranchea moskoriank sampddunk dium naka. "Tancho Dev khoim asa?" oxem raxttram modem mhonnunk kiteak mhonn nimit diunchem?'
18. Tedna Sorvespor Aplea desachê premaxen bhòrlo ani Tannem Aplê porjechi kaklut keli.
19. Zobab diun Sorvesporan porjek mhollem: 'Ho polle Hanv tumkam gonv, soro ani tel dhaddunk vetam, ani tumi dhadoxi zatoleat. Anink kednanch tumkam Hanv raxttram modem kenddnniancho mhal korun diuncho na.
20. Ut'torechea dusmanak Hanv tumchê thaun pois dhaddtolom ani eka sukea ani padd zal'lea ganvant taka dhanvddaitolom. Tachê fuddlean astolo udentecho doria ani tachê pattlean ostomtecho doria. To vhodd-vhodd vostu korunk bhair sorlolo dekhun, tacho durgondh sutt'tolo, tachi ghann-ghutt'ttan voir sortoli.'
21. Agê zomni, bhieum naka; sontosbhorit ani anondbhorit za, kiteak Sorvesporan vhodd-vhodd vostu keleat.
22. Ran'vott mon'zatimnô, bhieum nakat, kiteak oronneantlim chorva moidanam novean hirvim zaleant, zhaddam aplim follam ditat, dakvêl ani anjir subhamponnan follvont zaleant.
23. Sionachea putam-dhuvamnô, Sorvespora tumchea Deva sovem anondbhorit zaiat! Kiteak Tannem Aplea neaia pormannem tumkam xorôd-rutucho paus dhaddla, ani tumchê khatir To bhorpur paus ghaltolo, adlêch bhaxen xorôd-rutucho ani vosont-rutucho paus.
24. Mollnnechim khollim dhannea-gottean bhòrlolim astolim, pipam dakam-rosan ani telan upott bhoron òt'tolim.
25. Tumcher dhadd ghalunk Hanvem Mhojem tollanchem ani dhempeanchem, katorpi-kiddinchem ani chabddavpi-kiddinchem vhoddlem loskor dhaddlolem; tãnnim giraslolim vorsam Hanv tumchê khatir bhôrun haddtolom.
26. Tumi pott-bhôr jevun-khaun dhadoxi zatoleat ani Sorvespora tumchea Devachem Nanv vakhanntoleat, kiteak Tannem tumchê pasot itlim vismitam keleant. Magir Mhoji porza anink kednanch lojek poddchi na.
27. Ani hem tumi zanno zatoleat: ki tumchê modem Israelant Hanv asam, Hanv, Sorvespor tumcho Dev, ekloch eklo!'
28. Hea uprant sogllea mon'xakullacher Hanv Mhozo Atmo ghaltolom. Tumche put ani tumcheô dhuvô sondêx ditolim, tumchim utar piraiechim sopnam sopnetolim, tumchim tornnattim dorxonam ghetolim.
29. Gulam' dadleam ani bailancher porian tea disamnim Hanv Mhozo Atmo ghaltolom.
30. Mollbar ani prithumer Hanv ojapam-odbhutam korun dakhoitolom, rogot ani uzo ani dhunvrache khambe.'
31. Vhôdd ani bhirankull Sorvesporacho Dis udeunchê adim suriacho zatolo kallôkh ani chondrimachem zatolem rogot.
32. Sorvesporachem Nanv ghetat tea soglleank taronn melltolem. Kiteak, Sorvesporan sanglam tea pormannem, Sion Dongrar thoddim zannam vattovtolim ani Jerusaleant vanchtolo Sorvesporan apoil'lo urlolo zomo.
