1. Habakuk provadiachem magnnem: vilapanchea nadar.
2. Sorvespora, Tuji kirti hanvem aikolea; Tujea vavra mukhar, Sorvespora, mhaka koddkoddo sutt'ta. Amchea kallar porot to jivo dovor, amchea kallar tachi vollokh di; krodhan zolltai zalear-ui, Tujê kakluticho ugddas kôr.
3. Temana thaun Dev ieta, Paran Dongrar thaun Povitr Dev denvun ieta. Tachi thorai mollob dipkaita, ani Tachê mhoimen prithum bhòrlea.
4. Tacho lôklôk disa-uzvadda sarko,Tachea hatantlim kirnnam zhogzhogtat, thoinsoruch Tachi podvi liploli asa.
5. Dhamichi pidda Tachê fuddem veta ani zorimori Tachê pattlean cholta.
6. Ubo ravta tedna, To prithumek kampoita, Aplê nodren raxttrancher thorthoro haddta. Ani sasnnak thaun ube aslole porvot koddsortat, sodam togtole dongor konsllun poddtat: ho adim thaun Tacho rosto.
7. Kushanache tombu akantak sampoddleat te hanvem pollele, Midianachea tombunche podd'dde koddkoddtat mhonn hanvem dekhlem.
8. Sorvespora, nodincher itlo ragabhorit zalai Tum? Somudracho itlo rag Tuka? Heach pasot kai Tujea zhuza-ghoddeancher ani Tujea zoitivont rothancher bosun chol'loi Tum?
9. Tuzo dhonu Tum hatant ghetai ani tachi dori bannamnim bhôrtai. Vhallamnim Tum zomnint chori kholliô kortai;
10. Dongor Tuka polleun kamptat; udkacho lôtt vhanvon ieta; patall mottean goroz sôddta ani aplim lharam unch-unch ubarta.
11. Suria ani chondr aplea tthikannamnim ravtat, Tujea bannanchea uzvadda mukhar ani Tujea zhogzhokit bhaleachea lokloka hujir te pollapôll kaddtat.
12. Ragan bhoron Tum prithumecher dhanv-dhanvim choltai, krodhan raxttram mostitai.
13. Tujê porjek soddounk, Tujea obhixiktak rakhunk, Tum bhair sorlai; khotteanchea ghoranneachea fuddariak Tunvem marun uddoiloi, khoddpa porian tachi buniad Tunvem ukti kelii.
14. Tanche zhuzari tanchê dholint ôddun vhel'lea eka dolldireak girasunk sôdtolê porim, amkam ximpddaunk khuxalkaiecheô bobô marun te amchea angar ail'le; punn tanchea fuddariak Tunvem Tujea bhaleamnim tôpun marloi.
15. Patallantlim bollixtt udkam chollbollaun-khollbollaun, Tuje ghodde gheun Tum somdir maddoit ailoi!
16. Aikotôch, sogllem ang mhojem xirxirlem, avazan mhoje ontt koddkoddle; mhojim haddam ghollgholl'lim ani mhojea ponda mhojê pãi gollgollunk lagle. Thônd ravun tollmolleanchea disachi Hanv vatt polleit asam: amkam atam sotaitat tancher to dis udetolo.
17. Kiteak anjirachem zhadd fulona zait ani dak-velink dakô zainant zalear-ui, zoitunanchim zhaddam pik dina zatit ani xetam-mollantlem jevnna-khannak utpon mellona zalear-ui, oddpamnim anink menddram na zatit ani toxench gottheamnim gorvam mellonant zalear-ui,
18. Tori hanv Sorvespora sovem sontostolom, Deva mhojea Taroka sovem murgott'tolom.
19. Dhoni Sorvespor mhojem boll! To mhoje pãi merva bhaxen suddsuddit kortolo, ani mhojim panvlam porvotancher porian pavoitolo. Songit monddollichea fuddariak; taranchea vazontrancher.
