1. Hanv mhojea pahreachea zagear ubo ravtolom ani rakhnnê-gopurant pahro kortolom. To mhaka kitem mhonnttolo ani mhojea tokrarink koslo zobab ditolo tem polleunk ravtam.
2. Tedna Sorvesporan mhaka oso zobab dilo; Tannem mhollem: "Hem dorxon boroun dovor, konnem-i tem sompeponnim vachchê khatir tem folliancher boroun kadd.
3. Kiteak hem dorxon aplea nemlolea kallak: tem xarthi pavtolench ani tem fottounchem na; kallav korun iet zalear, tori tachi vatt polleit rav, kiteak chôdd lambai korinastana tem ietolench.
4. Polle, zanchem kalliz promannik nhoi, tim moddon poddtolim, punn promannik mon'xam aplea visvaxiponna vorvim jivim astolim.
5. Khorench, girestkai ghatki! Lobhi monis kodinch somadhanan jiena, aplo gollo to Norka itlo rund korta, ani Mornna vori tachi as bhagona, sogllim raxttram to apnnachea tabeant gheta ani soglle lôk apli pikavôll koxi dhôrta.
6. Tôr him sogllim tacho chuttko korinastana ravtolim kai? Tachê vixim umanneamnim ulounchim nant kai? Tim oxem mhonnttolim: Dusreanchi dovlôt apunn punzaita(kitlo kall meren?) ani gahannak dovorlolea vostumnim apunn odik girest zata, tachem kotta-kotta!
7. Tôr rinnkari ovchit ube zaunchenant kai? tuka koddkoddaitat te uttche nant ani tanchea tabeant poddcho naim tum?.
8. Tunvem zaitea raxttrank nagoileãi dekhun, urlolim sogllim raxttram tuka lutt'tolim, kiteak mon'xanchem tunvem rogot vikrailãi, desak, xarak ani soglleam thoim jietoleank zulum bhôgunk dilai.
9. Apnnak koslench nirbhag favo zaina zaunk aplo ghontter voir-voir korta ani aplea ghorabeak onitin zôddloli girestkai punzaita, tachem kotta-kotta!
10. Tujea ghorabeacher loz haddunk tum utthlai: zaitea lokancho nas korun tujeach nisonttonak tum vavurlai.
11. Kiteak vonnticho fatôr porian nixêd martolo ani patti bandavollint-thaun zobab ditoli.
12. Rogot varoun xar bandta ani khotteponnacher tem sthapta, tachem kotta-kotta!
13. Lokanche tras ujeak zollôv ani raxttrancho koxtti vavr soglloch nirfôll zata: Sorvsoktivont Sorvesporachea hukuman hem sogllem zata nhoi?
14. Jitlo somdir udkan bhòrlolo asa, titlo Sorvesporachê mhoimechê vollkhin sogllo dês upott bhoron ietolo.
15. Apnnem xezariank vinglle polleunchea nimitan tankam bebde kori porian aplem vik tankam pieunk dita, tachem kotta-kotta!
16. Khub-khub loz zôddleai tunvem, kirti nhoi! Tujê pallien atam tum pie ani sunôt korunk nasloli tuji kudd dakhoi. Sorvesporachea uzvea hatantlem patr atam tujê thaim pavlam, ani tunvem zôddlolê kirti poros atam odik vhôdd zatoli tujio kirti.
17. Kiteak Lebanonak tunvem kel'lo zulum tuka chirdditolo. Ani mon'zatinchi kapakapi tuka thorthoraitoli; kiteak mon'xanchem tunvem rogot vikrailãi, desak, xarak ani soglleam thoim jietoleank zulum bhôgunk dilai.
18. Kantoil'lê murticho koslo upêog? ani murtikaran kiteak mhonn ti korchi? ti mhollear êk dhatuchi protima, êk fottkiro xikxôk! Tori murtikar osle vacha-naslole kud'de dèv korta ani tancher aplo bhorvanso dovorta.
19. "Utth gô!" oxem lankddak mhonntta, ani monea fatrak: "zago za rê!," tachem kotta-kotta! (Hem tem bhakit!) Bhailean taka bhangar ani rupem lailam khorem, punn tachê bhitôr jivacho svasuch na!
20. Punn Sorvespor Aplea povitr Mondirant asa: Tachê mukhar soglli prithum ogich ravum.
