1. Habakuk provadian eka dorxonant ghetlolo sondêx.
2. Kedna porian, Sorvespora, Tuzo adar magum, ani Tum aikonastana ravtoloi? Kedna porian 'Zobordosti!' mhonn Tujea kanant bob marum ani Tum nivarcho naim?
3. Kiteak mhonn Tum mhaka onit polleunk ditai? kiteak mhonn Tum zulumxai sôstai? Nagovnn ani zobordosti mhojê mukhar distat, zhogddem ani dusong fultat.
4. Ani oxem Somurtichem boll moddon veta ani nit kednanch voir sorona, kiteak khotto monis promannik mon'xak khala xevttita ani hê porim nit ibaddloli dixtti poddta.
5. Raxttrancher tumche dolle laiat, polleiat, ani ojap zaiat, thottak zaiat. Tumchea khaxa jivitant jem Hanv korunk fuddem sorlam, tachi vollokh legun tumkam dilear, tem tumi sotmancheak nant!
6. Tôr polleiat, Hanv Kaldeikarank challoun haddtam; to lôk nixttur ani ragixtt, dusreanchim ghoram apnnachê adhin korunk te prithumecher pois pois desamnim pavtat,
7. te bhirankull ani kampero ghalpi, apnna bhair tankam kaide na, itle bollixtt te!
8. Tanche ghodde chiteam poros suddsuddit, ratchea koleam poros odik nixttur; tanche ghoddesvor fêr martat, tanche ghoddesvor pois thaun dhanvun fuddem sortat, girasunk axetolea goruda vori ghuri ghaltat.
9. Te ietat fokot zobordosti korunk tanchim tonddam udentechea varea porim bhazun kaddtat; te aplea koidiank renv zal'lê porim ubarun vhortat.
10. Te patxaianchim khebaddam kortat, razkunvrank te lekhinant. kottam-kil'leanchi te porva korinant, matieche band ubartat ani tankam aplea tabeant kortat.
11. Tedna varo bodolta ani veta...Aplench boll aplo dêv mhonn somzota tea mon'xak vhôdd guneanv asa.
12. Sorvespora, mhojea Deva, purvilea kallam-iugam thaun asa To, ani kodinch morona To mhozo povitr Dev nhoi Ga Tum? Sorvespora,Tunvem hê porjek keleai Tujê nitichem hatiar; Khoddpa mhojea, khast lavunk Tunvem tika mozbut keleai.
13. Tujea bhov nirmoll dolleamnim vaitt polleunk zaina, ani toxench zulumacher Tujean nodor ghalum nozo. Tôr koso mhonn Tum ghatkiank polleit asai? Apnna poros odik promannik asa taka khotto monis gillta tedna, kiteak mhonn Tum kãich mhonnonnaim?
14. Doriantli maslli zal'lê porim ani dhoni naslolea jivanneam sarkim Tum mon'xank vagoitai.
15. Ho lôk soglleank aplê goriek faraita, tankam aplea zallant ôddun haddta, aplea pagerant sampddaita. ani oso apunn jikhlo mhonn khuxal zaun mouz marta.
16. Hea khatir aplea zallak iôdn bhettoita ani aplea pagerak dhump lhasta, kiteak tankam lagun to sust sukhachem jivit jieta ani pott-bhôr jevta-khata.
17. Mhonnttôch, thar nastana to aplim zallam ritim korit ravtolo ani kakluti vinnem raxttrancho nas korit astolo kai?
