1. `Deva mukhar tumi patok kelam dekhun, Nebukadnezzar Babilonie-karancho raza, tumkam koidi korun pordesant vhorcho asa.
2. Babiloniek pavtôch, thoim tumi zaitim vorsam, satvi pinddka porian, ravtoleat; tea uprant Hanv tumkam thoinsorlim xantin portun haddtolom.
3. tedna chotrai dhôrat, tanchê bhaxen cholum nakat, tanchea devanchi koslich bhirant dhô-rum nakat.
4. (a)Jedna tanchim bhôz-nnaram pattlean ani fuddlean tankam paiam poddunk ietat,
5. (b) Portench zalear, tumchea kallzamnim oxem mhonnat: "Dhonia, Tuka eklea-kuch ami paiam poddunk zai."
6. Kiteak Mhozo dut tumchea san-gata asa, ani to tumcho jiv rakhta.
7. `Murtikaran tankam bhangar ani rupem kaddlam, ani tancheô jibô zhogzhogit keleat. Te kudde dèv ani tankam vacha na.
8. Olonkarank axetolea cheddvak zal'lê porim, ho lôk bhangar gheun aplea devanchea mathear ghalunk mukutt kortat.
9. Kednam-i puzari lipchoriam aplea devanchem bhangar ani rupem chorun vhortat ani apleach faideak vaportat ani tea bhair denngi koxi devllanchea devdaxink ditat.
10. Ru-peache, bhangarache ani lankddache kel'lea aplea devank te mon'xam bhaxen nhesoitat. Punn zambllea zhubean tankam nhesoilea uprant porian, apnnank kollomb vô rontto ieunk dina zaunk hea devam kodde ghoddona.
11. Tea bhair, tanchim tonddam fafddun pusunk zai, kiteak devllantlo dhul'l tancher dhatt boslolo asta.
12. Eka prantachea razpala bhaxen êk dêv aplea hatant êk betkatti dhôrta, tori apnnak opman kortoleacho jiv kaddunk to xokona.
13. Dusro konn dêv aplea uzvea hatan tolvar ani kuradd dhôrta, tori zhuzantlo vô choranchea hatantlo apnnakuch nivarunk tachean zaina.
14. Hantunt te dèv nhoich mhonn spoxtt kollon ieta; tankam bhieum nakat!
15. `Zoxem ek chaltem aidon ekdam futt'tôch kiteakuch upkarona, toxench he devllamnim bosoil'le dèv.
16. Dev-llant bhitôr sortoleanchea paiamnim ubta ti dhul'l tanchea dolleamnim bhòrlea.
17. Choramnim tanchim devllam nagoina zaunk, tanche pujari, tankam darvontte, kulpam ani addambe ghalun, tim ghott korun rakhtat. Ani zoxem razacher opman kel'lea koidiak, mornna-chem formonn poddlolean, bond-khonnint ghôtt rakhun dovortat, toxench hea devank toslea devllamnim koidi koxe ghalun tanchi ghôtt rakhônn kortat.
18. Te apnnankuch goroz tachê poros chodd divliô devanchea manak pettoitat, tori hankam êk-ui divli disona.
19. Devllacheô pattiô bhitorlean khavon vetat; tanchê sarke he dèv: zomnintli vallti bhair sorta, ani tankam khaun-khaun pokortat, ani tanche nazuk kop-dde-i khatat, ani tori hachi tankam kaich khobor na.
20. Tanchim tonddam devllantlo bhair sorun ieta tea dhunvrak lagun kallim-kitt zatat.
21. Pake, xerkam ani sogllê torechim suknnim ani mazram porian tanchê kuddir ani tokler bostat.
22. Hem sogllem te dèv nhoi mhonn da-khoun dita; tankam tumi bhieum nakat
23. `Polleunk sobit-sundor dispak tanchea angak bhangar kaddtat, punn konnuch tem saf korina zalear te zhogzogunk pavchech nant. Tea devank akar dilo tedna porian tankam kaich bhogonaslem.
24. Kitli-i kimôt diun tankam vikte ghetle zalear-ui, tanchê bhitôr jivacho svas nanch.
25. Tanchean cholunk zaina dekhun, tankam mon'xan-chea khandancher uklun vhorche poddtat; hê porim apnnank moluch na mhonn te dakhoitat; te bhuim poddtit zalear, tankam novean ube korche poddtat; dekhun hea devank bhôztat tankam unneponn bhògta.
26. Ekdam tankam ube kortôch, apnnachêch osttongim tanchean fuddem panvol marunk zaina; te vankdde zatit zalear, te apunnuch nitt ube zaunk xokonant; tanchea fuddeant danam dovorlim vô mel'leanchea fuddeant tim dovorlim - tem ekuch zalem.
27. Tea devank bhettoil'lim bolidanam tanche puzari novean viktat ani tancho faido apunn vhortat; ani tancheô potinim bolianchem thoddem mas mittak marun dovortat, punn goribank vô niradariank kaich dinant. Bolidananchi khobor kelear, mhoineachem zal'leô bailô ani porsutt zal'leô-i bailô hea bolidanank hat lavunk pattim soronant.
28. Hem sogllem polleun te dèv nhoi mhonn tumkam kollon ieta; tankam bhieum nakat.
29. `Khorench, bailô hea rupeache, bhangarache ani lankddache kel'lea devank bhettovnniô kortat zalear, koxem mhonn tankam dèv mhonn lekhunk zata?
30. Tanchea devllamnim puzari bosun ravtat, tanchim vostram pinzleant, mathem ani khadd tasleant ani te aplem mathem dhampinant;
31. Mel'leanchea ugddasak kel'lea jevnnar kortat toxem, te aplea devam mukhar bobô ani kinvchi martat.
32. He pujari aplea bailank ani bhurgeank nesounk devanche kopdde kaddun vhortat.
33. Hea devank konn-ui vaitt vô borem kortit zalear, tankam favo ti mozuri diunk te xokonant; eka razak xinvasonar choddounk vô xinvasona voilo denvounk hea devam kodde ghoddona.
34. Toxench girestkai vô duddu vanttunk te xokonant; konn-ui tankam êk angovnn korit ani ti pallina zait tôr, osleank khast lavunk tea devank podvi na.
35. Konnankuch mornnantlim soddounk tankam tank na vô bollixttachea chopkeantlim osoktank tanchean nivarunk zaina.
36. Na mhonn kudd'ddeank nodor portun diunk te xokonant; vô oddchonnik sampoddlo-leank pavunk tanchê kodde ghoddona.
37. Vidvechi-i kaklut korunk tanchean zaina, na mhonn onathank-ui udar kallzan te pavonant.
38. Bhangar ani rupem kaddlole he lankddache dèv mhollear porvota velea khoddpam sarke. Tanchi puza kortat tim lojek poddtolim.
39. Mhonnttôch, te dèv mhonn konnanchean mandun gheum-iet vô lekhum-iet?
40. `Tea bhair, Kaldeikaram porian tankam man dinant; konn-êk mono monis tankam sampddot ani tachê kodde ulounk zaina zait, te taka Bel deva-xim haddtat ani, hea devak aikum ail'lê bhaxen, te tea moneachi jib suttoi mhonn poratun magtat!
41. Tori hacho ôrth kitem zait to sôdun kaddunk ani tea devank patt vôllunk tanchean zaich na - itle ok'kol naslole te.
42. Bailô apleô penkttak doriô bandun rostear bôstat, dhumpa bodla kunddo lastat;
43. konn-êk vattsuro tantlê eklek gheun veta ani tichê kodde nhidta tedna, ti bail aplê kuxik aslolê bailecheô moskoriô korta, kiteak tika konnench vinchun kaddunk favo na zalem, tichi dori konnench tôddli na.
44. Hea devam khatir kortat titlem-i ôrth-naslolem. Oxem tôr te dèv mhonn konn tankam mandun gheit vô te dèv mhonn konn tankam lekhit?
45. `Tankam thovoiamnim ani xettimnim keleat: he vavraddi apnnank zai toso tankam akar ditat.
46. Hea devank kortat te monis apunnuch lamb aukh jieunk pavche nant; tôr tanchea hatamnim kel'leô vostu koxeô mhonn dèv zatit?
47. Apnnam pattlean ietat tankam te dovortat tem sogllem fottkirem ani be-abruchem daiz.
48. Zhuz uprasot vô nisontton iet tôr, apnnank ani aplea devank khoim lipoun dovorche tê vixim he puzari ekamekachi budh ghetat.
49. Zhuzantle ani nisonttonantle apnnankuch vattaunk tanchê kodde ghoddona zalear, te khore dèv nhoi mhonn konnachean-ui vollkhunk koxem zaunchem na?
50. Fokot lankddache korun tankam bhangar ani rupem kaddlam mhonnttôch, te fottkire dèv mhonn hachê vorvim soglleank kollon ietolem; soglleank, raxttrank toxench razank, te dèv nhoi punn mon'xanchea hatancho vavr ani tanchê sovem deivik kaich na mhonn ugddapem zatolem.
51. Te dèv nhoi mhonn konnank ozun khatri diunk zai?
52. `Khoinchea-i desacher êk raza nemun bosounk vô mon'xancher paus ghalun diunk vô aploch karbhar borê bhaxen cholounk vô onit sôstoleak vattaunk, tanchê kodde ghoddona.
53. Mollba ani zomni modlea kavlleam bhaxen te sarkech niradari.
54. Bhangar ani rupem kaddlolea lankddachea devachea devllank uzo lagot tôr, tanche puzari apnnank asro sôdunk dhanvun par kaddtat, punn te dèv, pattiam bhaxen, zollon vochunk thoinch ravtat.
55. Tea bhair, khoincheach razak vô dusma-nank fuddo korunk tankam tankoch na.
56. Oxem tôr, te dèv mhonn konnachean mandun gheunk, vô sangunk zata?
57. `Lankddache kel'le, bhangar vô rupem kaddlole he dèv choranchea ani lutt-marpianchea chopkeantle apnnan-kuch vattaunk xokonant; bollixtt monis tanchem bhangar ani rupem chorun vhortat ani tankam nhesoil'le kopdde-i vhorun par kaddtat; torui apnnankuch porian pavunk tankam tank na.
58. Oxem astam, osle fottkire dèv zaunchê bodla, konn apli xokti dakhoita toslo raza vô aplea dhoniachea gorzank upkarta toslem aidon zalo zalear, odik borem; vô osle fottkire dèv zaunchê bodla, ghorantleô vostu rakhta toslem dar zalo zalear, odik borem; he fottkire dèv zaunchê svater, razvaddeantlo êk lankddacho khambo konn zalo zalear, odik borem.
59. Suria, chondrim' ani noketram aplo uzvadd ditat, ani tankam ek-ekleak dil'lo vavr korun tim sogllim apnnank dil'li adnia palltat.
60. Toxench zoglavnnem marta tedna, tem polleunk ekdom' borem dista; têch porim, varo sogllea desantlean marta.
61. Ak'khea zogacher vochat mhonn kupank Dev ghalta to hukum' kupam palltat, ani porvot ani ran lasunk voir-thaun dhaddlolo uzo apnnak dil'lê adniek pallo ditat.
62. Punn hea devank, zaun surupaien zaum bollan, hea soglleam kodde sôr korunk zaina.
63. Hea pasot, he dèv mhonn mandun gheunk vô mhonnunk zaina, kiteak tanchean neainit korunk vô konnakuch kitem-i borem korunk zaich na.
64. Mhonnttôch te dèv nhoi mhonn tumi atam zannont dekhun, tankam bhieum nakat.
65. `Te razancher xirap na mhonn axirvad ghalunk xokonant.
66. Raxttram khatir tanchean ontrallar khunna dakhounk zaina, na mhonn suria bhaxen porzo-llunk zaina, na mhonn chondrima bhaxen uzvadd diunk zaina.
67. Hea devam-vôn zonavoram odik borim, kiteak apnnank asro sôdunk pollun vochun tanchean aploch jiv rakhunk zata.
68. Mhonnttôch, te dèv mhonn dakhounk kaich puravo na; dekhun tankam bhieum nakat!
69. `Tanche lankddache ani bhangar ani rupem kaddlole dèv chibddanchea porsantle toddge: te konnachich rakhônn korinant.
70. Têch porim, lankddache kel'le, bhangar ani rupem kaddlole tanche dèv sogllim suknnim ieun bostat toslem bagentlem kannteri jhilkutt; vô kallokhant uddoil'lem ek dhor.
71. Tanchi zamblli ani omolik nhesônn tanchê pattir kotteun veta tem polleun, te dèv nhoi mhonn tumkam kollon ietolem ani xevttak te virun vetole ani desak kenddnniancho mhal zaunk pavtole
72. Tea pasot, kuddea devank paiam poddonant tim mon'xam odik promannik, kiteak tim kednanch lojek sampoddchim nant!'
