1. Zhuzam ani zhogddim tumchê modem khoim thaun upzotat? Tumchêch bhitôr zhuz kortat tea vondovnniam thaun tim upzotat, oxem nhoi?
2. Tumkam kitem zai tem tumkam mellona; mhonnttôch tumi dusreacho jiv kaddunk toiar asat. Vhôdd axen kiteachê pattim tumi lagtat, punn ti vôst tumchea hatant poddona; tednam tumi tumchê modem zhogddim ani zhuzam kortat. Tumkam zai tem tumkam mellona, kiteak tumi tem Deva lagim maginant.
3. Tumi girestkai magtat ani Dev ti tumkam dina kiteak vaittovea monan tumi magtat: mhonngê tumchêô vondovnniô bhagoun ti girestkai hogddaunk tumchem mon asa.
4. Tumi Devak ovisvaxi! Hea sonvsarachi ixttagôt Devachi dusman'kai mhonn nokllot tumi? Kiteak khorench, jim konn hea sonvsarachi ixttagôt zôddtat, tim Devachim dusmanam zatat.
5. "Devan amchê bhitôr tthikan korunk Aplo Atmo ghala To amchea mogak premaxen otrekta", oxemPovitr Pustok sangta tem bexttench dista tumkam?
6. Tôri To odik udarponnan Apli doiallai amkam bhôgunk dita; hea pasot Povitr Pustok sangta: "Dev gorvixttank zollta ani khalteank Apli doiallai bhôgunk dita."
7. Oxem tôr, Devak khaltim zaiat; devcharacher zhuz korat ani to tumchê thaun pollun vetolo.
8. Jitlim tumi Devak lagim sortat, titlo Dev tumkam lagim sortolo. Patkiamnô, tumche hat nitoll korat! Sonvsaracho ani Devacho borabôr môg korunk sôdtat tim tumi, tumchim kallzam xud'dh korat!
9. Tumchem dolldirponn polleun khontiborit zaiat ani roddat; hanschê svater rudon korat, ani khuxal aschê svater dukh korat.
10. Sorvespora mukhar khaltim zaiat ani To tumkam voir kaddtolo.
11. Mhojea bhavam-bhoinnimnô, ekamekachem vaitt uloum nakat. Jim konn aplea bhavachem vô bhoinnichem vaitt uloitat vô tanchi nit kortat, tim Somurticher add uloitat ani tichi nit kortat; ani Somurtichi tum nit kortai zalear, tum ti pallinaim punn ticho mon'subidar zatai.
12. Dev ekloch Somurt-Datar ani To ekloch Mon'subidar. Taka ekleakuch taronn diunk ani nas korunk tank asa. Punn tujea peleachi nit korunk tum konn?
13. "Aiz vô faleam omkea nogrant ami vetoleanv, thoim ek voros-bhôr ravtoleanv, dhondo kortoleanv ani khub girestkai zomoitoleanv" - oxem mhonnttat tim tumi, mhojem aikat.
14. Faleam kitem zatolem tem tumi kãich nokllot. Tumchem jivit mhollear kitem? Tem dova sarkem: thoddo vêll to dixtti poddta ani uprant nanch zata.
15. Tumchean mhonnum-ieta tem itlench: "Devak zai zalear ami jivim astoleanv ani hem vô tem kortoleanv."
16. Punn atam gorvan bhoron tumi boddai sangtat! Osli boddai sodam vaitt.
17. Mhonnttôch, jim konn kitem sarkem tem zannont ani tôri tem korinant, tankam guneanv asa.
