1. Mhojea bhavam-bhoinnimnô, tumchê modle chodd-xe dhormache xastri zaunk fuddem sorche nhoi, kiteak toxem ami odik khôr zhôddtek sampddonk xoktanv mhonn ami zannonv.
2. Khorench ami sogllim zaitea vattamnim chuki kortanv. Utramnim kednanch chuk korinant tim mon'xam sopurnn; apnnankuch tanchean purnntaien domaunk zata.
3. Amkam zai tem korunk ghoddeachea tonddant logom' ghalem mhonnttôch, taka soglloch amkam zai toso bhonvddaunk zata.
4. Vô tarvank polleiat: kedim-i vhodd tim zaum, kitlea-i khôr varean tim lotton vochum, eka dhaktulea verea udexim tandelan apnnak zai thoim tim vhorunk zata.
5. Oxench jibê sorim ghòddta: ti êk lhan sandho khoro, punn apnnachich vhôdd boddai ti sangunk xokta. Ujeachi êk dhakttuli kitt koxê bhaxen ek vhoddlem ran lasun uddounk xokta tem chintat.
6. Jib-ui ujeachêch bhaxen. Amchea sandheam modem jib apunnuch êk khotteponnacho sonvsar: ak'khi amchi kudd ti khotaita ani, iem konddantlea ujean apunnuch lason, aplea ujean ak'khea mon'xakullachea jivitachem chokr ulpaun uddoita.
7. Sogllê tôrechi ran'vôtti mon'zat, suknnim, jivannim ani maslli mon'xanchean domaunk zata ani mon'xamnim domaileant;
8. punn jib domaunk konnuch xokona. Ti mon'xank thar-dinaslolem vaitt, marekar vikan bhòrlolem.
9. Tichê udexim Devak, amchea Bapak, ami dhin'vastanv, ani tichêch udexim Devachea sarkeachim rochlolea mon'xank xiraptanv.
10. Axirvad ani xirap teach tonddantle bhair sortat. Mhojea bhavam-bhoinnimnô, hem oxem zaunk favôna.
11. Êkêch zhorichea ekach tonddantlean godd udok ani koddu udok kednam tôri vhanvtat?
12. Mhojea bhavam-bhoinnimnô, eka anjirachea zhaddak dakô zaleô ani êkê dakanchê valik anjiram zalim mhonn asat? Toxench kharem udok vhanvta thoinsorlem godd udok vhanvum nozo.
13. Tumchê modem zannvaiechim ani somjikaiechim asat konn? Tãnnim aplea jivitachê borê chalin, mhonngê nomrutaien ani zannvaien kel'lea kornniam vorvim, apunn toslim mhonn dakhounchem,
14. Punn tumchea kallzant nidd'ddukaiechi kôddsann vô svarthi axa asa zalear, tumchi boddai sangun sot tem fottimnim lipoum nakat.
15. Osli zannvai sorgar thaun iena: ti sonvsarantli, mon'xasoimbachi ani devcharachi.
16. Zoim nidd'ddukai ani apleponn asat, thoim dispôtt ani sogllê tôrechem vaitt.
17. Sorgar thaun ieta ti zannvai poilê svater nirmôll; tea bhair xant, dulôb ani bholi; ti konnvallaien bhòrloli ani borea kornnianchem pik dita tosli; ti tonddam polleun kamam korina, ddhongeponnanui cholona.
18. Xanti-korpi mon'xam jitlim xantichim biam vômpun vetat, titlem Devak man'ta toslem jivit vaddon veta: oslea soglleam modem vaddlolea jivitachem pik tim lunvunk pavtat.
