1. Mhojea bhavam-bhoinnimnô, Jezu Kristacher, amchea mhoimevont Somiacher, tumi bhavarth dovortat zalear, tonddak polleun lokak vagoum nakat.
2. Tumchi sobha bhòrta tednam, dogam mon'xam bhitôr sortat mhonn somzat: eklo bhangarachim udi ani nazuk vostram ghalun, ani dusro bondram nhesun konn gorib monis.
3. Borem nhesun ail'leak tumi manan ghetat ani taka mhonnttat: "Hê manachê svater bos". Ani tea goribak mhonnttat: "Hothoim ubo rav", vô "hanga sokol bos mhojea pãiam lagim".
4. Hem kitem? Tumchêch modem vegllochar kortat nhoi tumi? Khotto nêm' dhôrun ho nirnnoi tumi dila!
5. Aikat, mhojea bhov mogachea bhavam-bhoinnimnô: sonvsarapormannem konn gorib asat? Tankam Devan vinchun kaddleant ani bhavartachi girestkai dilea mhonn nokllot tumi? Ani hankam ki Tannem Apnnacho môg kortoleank bhasail'lea Rajeachem daiz dilam.
6. Punn tumi zalear goribank beman kortat. Zobordosten tumkam piddapidd diun neaisobhent oddun vhortat tim konn? Girest lôk nhoi?
7. Tumchê voir ucharlam tea vondivont Nanvachi ninda kortat tim tinch nhoi?
8. "Tuzo môg kortai tosoch tujea peleacho kôr! - ho Povitr Pustokant dil'lo Devachea Rajeacho mukhêl kaido tumi samballxat zalear, borem kortat.
9. Punn tumi mon'xank tondda pormannem lêkhtat zalear, tumi pap kortat ani tumkam guneanv asa mhonn Somurt nirnnoi dita.
10. Karonn jim konn ak'khi Somurt samballtat punn ticho êk nêm' porian môddtat, tim ak'khi Somurt môddlolê porim guneanvkaram zatat.
11. Kiteak Zannem mhollam: "Pordvar korum noiê", Tannem oxem-i mhollam: "Jivexim marum noiê". Tunvem pordvar korunk nai mmhonn dhôrum-ia punn konnak jivexim marloi zalear, tunvem Somurt môddlich.
12. Amkam suttka dita tê Somurtipormannem Dev amchi zhôddti kortolo, tôr tê Somurti pormannem uloiat ani cholat.
13. Peleak doia dakhounk na tea mon'xanchi zhôddti kortana Dev-ui tankam doia dakhouncho na. Punn peleak doia dakhoilea tankam zhôddtechi bhirantuch na.
14. Mhojea bhavam-bhoinnimnô, apnnank bhavarth asa mhonn konn-konn mhonnt tit punn kornniamnim tim aplo bhavarth dakhoina zatit zalear, to bhavarth tankam kiteak upkarot?
15. Ho bhavarth tankam suttka diunk xokta? Êk bhav vô bhoinn vingllim bhonvtat ani tankam dispotto giras na,
16. ani tumchê modlim konn-konn oxem tankam mhonnttat mhonn somzat: "Xantin vochat, ubek angak kitem-i ghalat, ani pottbhôr jevat". Punn hea tanchea kuddichea gorzank tumi pavonant zalear, kiteak upkarot?
17. Bhavartha vixim oxench ghòddta: kornniô nant zalear, bhavarth mel'lo zata.
18. Ghoddiek konn mhonnot: "Thoddea amchea bhavam-bhoinnink bhavarth asa, dusrim boreô kornniô kortat. Hachê vixim kitem sangchem?" Boreô kornniô korinant toslea mon'xank khorench bhavarth asa mhonn dakhoixi tum mhaka? Hanv zalear boreô kornniô korun mhaka bhavarth asa mhonn dakhoitam.
19. Dev êkuch mhonn tum sot man'tai mum? Borem kortai. Devchar-ui toxench sotman'tat ani bhirantin koddkoddtat.
20. Arê dêddxannea, kornniam vinnem bhavarth mel'lo zata mhonn tuka dakhoum?
21. Abrahaman, amchea bapan, vedicher aplea puta Izaakak somorpun dil'lean, kornniank lagun taka Devan Apnnak manovlolo korunk na?
22. Hê bhaxen, tachea kornniam vangdda tacho bhavarth vavurtalo, ani teach kornniam vorvim tacho bhavarth sompadnnek pavlo, hem lokxant ghe.
23. Oxem hem Povitr Pustokantlem utor ghoddon ailem: "Abrahaman Devacher bhavarth dovorlo ani hea bhavarthak lagun taka Devan Apnnak manovlolo kelo". Ani Devan taka Aplo ixtt mhonnlo.
24. Mhonnttôch bhavartha pasotuch nhoi, punn kornniam pasot Dev mon'xak promannik korta mhonn tumi polletat.
25. Toxench Rahab xindôll bailê vixim ghòddlem: tinnem bhediank borê bhaxen ghetle ani dusrê vatten tankam dhaddle dekhun, tichea hea kornniank lagun tika Devan Apnnak manovloli keli, oxem nhoi?
26. Zoxi pranna vinnem kudd mel'li zata, tosoch bhavarth kornniam vinnem mel'lo zata.
