1. Fitur ani bhoxttol'lea xarachem kotta-kotta! zulmi xarachem kottakotta!
2. Tannem Mhojea uleak kan diunk na, Mhoji xist khaltikaien mandun gheunk na, Sorvesporacher visvas dhôrunk na, aplea Deva sorxim tem kednanch ieunk na.
3. Tache razkarbhari goroztole xinv, tache mon'subidar dusrea disak kãich dovrinant tosle padd ganvche kole,
4. Tache provadi boddai sangpi, fotting monis, tachea iadnikamnim povitr tem bhoxttailam ani Somurt môddlea.
5. Zo Promannik, to Sorvespor tachê sovem ravta, to koslich chuk korina; sokallchê sokallim To Aple nirnnoi dita, chukonastana dôr fantear; (tori khotteak lozuch na).
6. Xarancho Hanvem bhosm kela; tanche konnxea-gopur moddon poddleat; tanche roste Hanvem rite keleat: konnuch tanchê velean cholona; tanchim xaram môddun ghaleant ani atam osadd poddleant, lôk-naslolim zaleant.
7. Tum tori Mhojem bhem dhôrtoleim, tum tori Mhoji xist khaltikaien manun ghetoleim, ani jeô khasti Hanvem tankam laileat, teô tanchê nodrê mukhaileô nopoit zauncheô nant, oxem Hanv chint'talom. Punn na, sogllê torechim khotteponnam korunk tanchi axa-usuktai odikuch vaddli.
8. Dekhun, Mhaka ravat -uloita toSorvespor!- firiad korunk Hanv ut'thtolom tea disak ravat; karonn raxttrank zoma korunk, sogllim rajeam zomoun haddunk, ani tancher sogllo Mhozo krôdh ôtounk, Mhojea ragache zall pettounk, Hanvem tharav ghetla; karonn Mhojea premaxechea ujean soglli prithum lhason vetoli.
9. Hôi, sorv raxttramnim Sorvesporachem nanv gheunchê khatir ani ekchitan Tachi chakri korchê khatir, Hanv tanche ontt xud'dh kortolom.
10. Ethiopiechea nodinchê poltoddi thaun porian Mhaka ulo martolim tim Mhaka somorponnam haddtolim.
11. To Dis ietolo tedna, ekdam Mhojer kolpun tumi kel'lea sogllea vaitt kortubanchi anink kednanch tumkam porot loz bhògchi na, karonn jim konn tumchê modem aplê urmottaien murgott'tat,tankam soglleank Hanv tumchê modlim kaddun uddoitolom; Mhojea povitr dongrar tumi anink kednanch gorvan cholchim nant.
12. Punn tumchê modem Hanv fokot vinômr ani lhanvik lôk uro-so kortolom,
13. ani Israelacho urlolo zomo Sorvesporachea nanvant apnnak asro sôdtolo. Tim anink vaitt korchim nant, ani fotti marchimnant; ani lobadd jib anink tanchea tonddant mellchi na. Punn konnuch tras dinastana tankam chorvak vochunk ani visôv gheunk melltolem.
14. Sionachê dhuvê, sontosachim gitam gav! Israela, khuxalkaieche ul'las sôdd! Jerusaleachê dhuvê, anondbhorit za! sogllea tujea kallzan sontosache ul'las sôdd!
15. Tujer marlolem formonn Sorvesporan pois kelem; tujea dusmanak Tannem bhair ghalo. Israelacho Raza, Sorvespor, tumchê modem asa. Tujer anink vign iet mhonn koslich bhirant na tuka.
16. To Dis ietolo tedna, Jerusaleak mhonnttolim: Siona, bhieum naka, tuje hat gollunk dium naka.
17. Sorvespor tuzo Dev tujê sovem asa, Podvedar Tarôk To. Tujê khatir To khuxalkaien murgott'tolo, Aplea mogan To tuka novi kortolo.
18. Utsovacho dis zal'lê porim, tujê khatir khuxalkaieche ul'las sôddun To nachtolo. Tujem nirbhag Hanvem kaddun uddoilem, tachi loz tuka anink bhôgunk poddchi na.
19. Tujer zobordosti choloitolea dusmanam add Hanv atanchê-atanch upai ghetam. To dis ietolo tedna, thontteanchi Hanv kallji ghetolom ani ximpoddloleank zoma kortolom, ani tanchem durdoiv kaddun ak'khê prithvecher tankam man ani kirti portun ditolom.
20. To dis pavtolo tedna, Hanvuch tumkam vatt dakhoitolom; to dis pavtolo tedna, Hanv tumkam ektthaim kortolom; ani tumcheach dolleam mukhar tumchem durdoiv kaddtolom tedna, prithvechea sogllea porzam modem Hanv tumkam abru ani kirti ditolom. Uloita to Sorvespor!
