1. Loz-naslolea raxttramnô, ekach disa bhitôr na zata toslea pola bhaxen tumkam duspottaunchê adim, ektthaim zaiat, zoma zaiat; Sorvesporachea zolltea ragachi xiront tumcher poddchê adim, ektthaim zaiat!
3. Sogllim tumi, prithumechea khaltea mon'xamnô, Tacheô adnia palltoleamnô, Sorvesporak sôdat. Promannikponnan cholat, nomrutaien cholat: oxem Sorvesporachea ragachea Disa tumkam ghoddiek asro mellot.
4. Tôr Gaza osadd poddtolem ani Ashkelonachem ghorttan zatolem; Ashdodant ravtoleank disa uzvadda dhôrun vhortole ani Ekronant asloleank pallam soit umttun kaddtole.
5. Doria-kinariancher jietoleanchem kotta kotta! Kheretitkaranchea raxttrachem kottakotta! Tumcher add Sorvesporachem utor hem: Filistikaranchea desa, Hanv tujer podvi choloitolom, Hanv oso tuzo vinas kortolom, ki konnuch thoim anink vosti korcho na;
6. ani kinarianche dês zaunk pavtole chorvacho zago, gonvlliank chorvachim mollam, ani menddrank oddpam,
7. ani doria-kinari zatoli Judachea Ghoranneachea urlolea zomeachi; thoim tim aple hindd chorvak vhortolim, ratchim Ashkelonachea ghoramnim tim visôv ghetolim, karonn, Sorvespora tanchea Devan tankam khast lailea uprant, To tanchi dhon-dovlôt portun ditolo.
8. Moabache opman Hanvem aikoleat ani Ammonkarancheô ninda: tãnnim Mhojê porjek opman kele ani aplea rajeancheô ximô vaddoileô mhonn boddai dakhoili.
9. Hea pasot, Mhojea jivachean -uloita to Sorvsoktivont Sorvespor,Israelacho Dev!- Moab Sodoma sarko zatolo, ani Ammonkaram Gomorra sarkim, khatkhutlianchem raj, mitthachi ras, sasnnak osadd poddlolim! Mhojê porjentlo urlolo zomo tankam lutt'tolo, Mhojea raxttrantlim vanchon urtolim tim tanchem daiz aplem kortolim.
10. Sorvsoktivont Sorvesporachê porjechi tãnnim ninda keli ani tika boddai dakhoili dekhun, hi zatoli tanchea gorvachi mozuri.
11. Sorvespor tankam bhirankull zatolo, karonn prithumê velea sogllea devank To ximpddaitolo. Tedna tim sogllim Takach bhôztolim ap-aplea zagear thaun raxttranche soglle zunve.
12. Tumkam-i, Ethiopiekaramnô, Mhoji torsad aspas tôptoli.
13. Ut'toricher add To aplo hat ubartolo ani Assiriechem nisontton kortolo; To Nineveh osadd korun sôddtolo, eka oronnea sarkem sukem.
14. Thoim bhitôr hindd visôv ghetole ani toxinch ran'vott mon'zati; pannkolli ani sall vonntinchê berint ratchim ghontter kortolim; zonelakodde ghugum roddtolem ani darachea umbrear kavllo aroddtolo, karonn devdar humttun uddoila.
15. Xar oxem zatolem: ekdam sukhest ani huskea-mekllem tachem jivit aslem, ani mhaka lagpi konn na, hanv eklench-eklem! oxem apnnacheach monant tem chint'talem. Ani atam tem kitem zatolem? Ek ghorttann, ran'vott mon'zatink ravunk ek dhôl, ani thoinsorlean ietim-vetim sogllim xilonni ghaltolim ani aple hat voir uddoitolim.
