1. Sordarank ani sorkari odhikariank khaltim zaunk, tanchea utrak pallo diunk ani koslea-i borea kamak kobul asunk tankam ulo kôr.
2. Konnachench vaitt uloina zaunk, zhogddim manddina zaunk, punn somest mon'xam thaim mannsugechim zaunk ani sodam rit-rovis samballunk tancho kaido mhonn tankam xikoi.
3. Tôr amkam-i eka vellar Devachi sarki vollokh nasli, Devachi khuxi ami korinasleanv, ami vatt chuklolim mon'xam asleanv; khotteponnant ani nattkaient amche dis ami kaddtaleanv; dusrim mon'xam amkam zolltalim ani aminch ekamekak zolltaleanv.
4. Punn udelem amkam bholeponn Deva amchea Soddvonnarachem, udelo Tacho vhôdd maiêmôg mon'xam thaim!
5. Tednam ami promannikponnan boreô kornniô kel'leô mhonn nhoi, punn Aplêch kaklutin Tannem amkam soddvonn dili: novo zolm ditolea snanan Tannem amkam dhulim ani Povitr Atmeachê podven amkam novim mon'xam kelim.
6. Amchea Soddvonnara Jezu Krista udexim Tannem Povitr Atmo subham'ponnim amkam dilo.
7. Oxem korun, Tachê doiallaien ami Devak manovlolim zaun, Tannem amkam dovorlolea daizacho bhorvanso amkam aso-so kelo.
8. Hi xikovnn khatrechi. Hi soglli xikovnn tunvem nettan diunchi mhonn mhaka zai; hê bhaxen, Devacher bhavarth dovorla tim umedin borea kornniank aplem dhean-mon lavunk pavtolim. Hi xikovnn ut'tôm' ani sogllea mon'xank faideachi.
9. Punn ôrth-naslole vad-vivad vattai, toxench teô vônxavollincheô khobrô ani Somurti vixim dusongam ani zhogddim: tancho kosloch faido iena ani tankam moluch na.
10. Bhêd ghaltolea mon'xank êk-don pavtti xiddkailea uprant, tanchi vatt sôdd,
11. kiteak oslim mon'xam khottea monachim ani papi; apleach ontoskornna mukhar tim guneanvkaram.
12. Artemasak ani Tikikusak hanvem tujê-xim dhaddina fuddem, tum vogôt moddinastana Nikopolisak mhojê-xim ie; tôr thoim hanvem hinvallo kaddcho kela.
13. Zenas vôkilak ani Apol'lok aplê vattek lagunk zotnaien adar di tankam vattek kitench unnem zaina-xem kôr.
14. Aplea jivachea gorzank upkarta toslo boro vaur-dhondo korunk amchea sogllea lokan xikchem; konnench bekar ravchem nhoi.
15. Mhojê-xim asat tim sogllim tuka noman kortat. Bhavarthachea ekvottant amcho môg kortat tankam amcho nomoskar. Devachi doiallai tumam-somestam sovem asum.
