1. Punn tum tujê pallien osol ani dhodd xastrak sobta tosli chal tankam xikoi.
2. Zannte dadle olpobhozonni, unch dheianche, moriadiche, toxench bhavarthant, pritimogant ani sõsnnikaient thir-dhodd zaunche.
3. Têch porim zannteô bailô bhoktivont jivitacheô zauncheô; tãnnim chaddiô sangcheô nhoi ani bebdikai korchi nhoi; tãnnim borê dekhichi vatt dusreank xikounchi;
4. tanchê koddchem tornnea bailamnim ap-aplea ghovacho môg korunk ani aplea bhurgeanchi opurbai korunk xikchem;
5. toxench teô moriadicheô, nirmoll jivitacheô, aplea ghora-daracheô, moipaxi, ani ap-aplea ghovak khalteô zauncheô. Hê porim Devachea utrak beman zauncho na.
6. Toxench tornnea dadleank mannsugen cholunk budh di.
7. Soglleanch vattamnim borea kornnianchi dêkh di; soroll monan ani fikirin tuji xikovnn di;
8. tujem ulovp itlem borem ani sarkem zaum-di, ki tantum koslich khôdd sampoddchi na. Toxem amcher kitench vaitt ulounk zaina mhonn polleun, amchea dusmanank loz bhògtoli.
9. Aplea dhoniank sogttant khaltim zaunk zai mhonn gulamank sang; tankam portem dinastana, tãnnim tankam khuxi korchim.
10. Tãnnim tanchem kãich chorun kaddchem nhoi; portench zalear, sogllea kamamnim apunn sarkim khatrechim mhonn tãnnim dakhounchem. Hê bhaxen Deva amchea Soddvonnarachê xikovnnek sogllea vattamnim tim man haddtolim.
11. Somest monxank soddvonn dita ti Devachi doiallai dixtti poddli.
12. Ti doiallai amkam odhormi jivitachi vatt ani sonvsari axa sanddunk ulo korta; amcho vorto Dev ani Soddvonnar Jezu Krist mhoimen dixtti poddtolo tednam, amkam sukh melltolem: tea sukhacho bhorvanso dhôrun, Tachi vatt ami polleun asanv. Tea mhonnosôr, hea iugant amchem jivit mannsugechem, Devak man'ta toslem ani Tachê bhoktichem korunk tich Devachi doiallai amkam vatt dakhoita.
14. Tannem amchê pasot Apnnachench bolidan kelem, ani oxem sorv tôrechea khotteponantlim amkam soddoilim, ani amkam xud'dh-nirmoll korun Apli khaxa porza keli, boreô kornniô korunk sodam aiti.
15. Hem sogllem tankam sang, tankam ghottai di ani sogllea odhikaran tankam bobatt kôr. Konnench tuji beporva korchi nhoi.
