1. Darius razachea dusrea vorsa; Satvea mhoineachea ekvisavea disa, Haggai provadia vorvim Sorvesporachem utor oxem kollit zalem:
2. Jerubbabelak, Sheialtielachea putak, Judachea razpalak, tosoch Joshuak, Jehozadachea putak, porom-iadnikak, ani porjechea sogllea urlolea zomea kodde uloi;
3. tankam oxem sang: "Adlea dobajean hem Dev-mondir dekhlolem toslo tumchê modem konn tori monis urla zait? Ani tem tumkam atam koxem dista? Thoinsor kãich na-xem tumkam disona?
4. Torui atam dhir ghe, Jerubbabela! – uloita to Sorvespor! — Kalljidar za, porom’-iadnika Joshua, Jehozadakachea puta! Ani tumi, desantlea sogllea loka, tumchem kalliz ghôtt dhôrat! – uloita to Sorvespor! — Vavrak lagat! Tumchea sangata Hanv asam – uloita to Sorvsoktivont Sorvespor!
5. ani tumchê modem Mhozo atmo hajir asa. Bhieum nakat!
6. Tôr Sorvsoktivont Sorvespor oxem sangta: matxea vellan, sôrg ani prithum’, doria ani suki zomin Hanv thorthoraunk vetam.
7. Sogllim raxttram foddfoddaitolom ani sogllea raxttranchim bhanddaram vhanvun ietolim, ani hem Dev-mondir mhoimen bhôrtolom -uloita to Sorvsoktivont Sorvespor!-
8. Rupem Mhojem, bhangar-ui Mhojem! -Uloita to Sorvsoktivont Sorvespor!-
9. Hea novea Dev-mondirachi mhoima adlea mondirachê mhoimê poros odik oprub zatoli Sorvsoktivont Sorvespor sangta ani hea zagear Hanv xanti ditolom. -Uloita to Sorvsoktivont Sorvespor!" '
10. Dariusachea dusrea vorsa, nnovea mhoineachea chovisavea disa, Sorvesporachem utor Haggai provadiak oxem pavlem:
11. Sorvsoktivont Sorvespor oxem sangta: "Hea prosna vixim nirnnoi diunk iadnikam lagim mag:
12. Konn aplea vostrachê doddint ghalun Devak bhettoil'lem mas vhorot ani to tem unddeak, pollovak, soreak, telak vô jevnnachea koslea-i jinosak tenkunk diit zalear, ho jinôs povitr zatolo kai?" ' Iadnikamnim zobab dilo: 'Na.'
13. Tedna Haggaian mhollem: 'Eka moddeak tenkun mhello zal'lo konn-eklo monis oslea jevnna jinosam modlea ekak tenklo zalear, to jinôs mhello zatolo kai?' Iadnikamnim portipall kelo: 'Mhello zatolo.'
14. Tedna uloun Haggaian mhollem: 'Hich Mhojea dolleam mukhar hê porjechi gôt, hich hea raxttrachi gôt -uloita to Sorvespor!- hich tanchea hatanchea sogllea kamanchi-i gôt; oxem kitem-i tim hanga bhettoitit, tem mhellem.
15. Tôr atam, aichea disa thaun zotnaien chintat: Sorvesporachem povitr Mondir bandunk fatrar fatôr dovorchê adim,
16. tumchi poristhiti kosli asli? Tumi vis mapanchê raxik pavtaleat, punn fokot dha mapam melltalim; tumi soreachea eka bollantlim pon'nas mapam kaddunk sôdtaleat, punn fokot vis mapam melltalim.
17. Soglleak tumi tumche hat ghale, punn vadoll, dôv ani korveancho paus dhaddun, tumkam Hanvem boddoilim, tori tumi Mhojê-xim portun ieunk nant -uloita to Sorvespor!-
18. Dekhun, aichea disa thaun(nnovea mhoineachea chovisavea disa thaun, Sorvesporachea Mondirachi buniad ghalea tea disa thaun) zotnaien chintat:
19. koddeant ozun dhaneachem bim na zalear-ui, ani dak-velik ani anjirachea zhaddak, ddalimik ani ajetinik ozun follam zainant zalearui. 'Aichea disa thaun Hanv tumcher axirvad ghalunk vetam.'
20. Mhoineachea chovisavea disa Sorvesporachem utor dusrê pavtti Haggaiak oxem pavlem:
21. Jerubbabelak, Judachea razpalak, uloi. Oxem sang: "Sôrg ani prithum Hanv thorthoraunk vetam.
22. Rajeanchim xinvasonam umtim uddoitolom ani raxttranchea razanchê podvecho nas kortolom. Roth ani tanche pongodd umtho uddoitolom; ghodde ani ghoddesvar khala poddtole, ek-eklo ap-aplea vangddiachê torsadin.
23. To dis ietolo tedna -uloita to Sorvsoktivont Sorvespor!- Jerubbabela, Sheialtielachea puta, Mhojea sevoka, Hanv tuka kaddun ghetolom -uloita to Sorvsoktivont Sorvespor!- ani tuka Mhoji xik'keachi mudi zai-so kortolom. Kiteak Hanvem tuka venchun kaddla -uloita to Sorvsoktivont Sorvespor! " '
