1. Hanv Paulu, Jezu Krista pasot bondkhonnint poddlolo, ani amcho bhav Timot tuka, Filemona, Jezuchê sevent amchea mogachea vangddia, noman kortanv.

2. Toxench noman kortanv Apfiek, amchê bhoinnik, ani Arkipusak, amchê bhaxen bhavartha khatir itle koxtt ghetoleak, ani tujêa ghorant zomtolê Povitr-Sobhek.

3. Dev amcho Bap ani Jezu Krist amcho Somi tumkam Apli doiallai ani xanti bhogunk dium.

4. Mhojea magnneamnim tuzo ugddas kortam titlê-i pavtti mhojea Devak dhinvastam,

5. kiteak Devachea sogllea bhoktancho tum kitlo môg kortai ani Somia Jezucher kitlo ghôtt tuzo bhavarth, tem hanvem aikolam.

6. Tuzo ani mhozo êkuch bhavarth; tôr ho bhavarth dakhounk Krista pasot kitlem borem amchean korunk zata tachi purnn vollokh amkam mellum mhonn hanv magtam.

7. Tujêa mogachi khobor aikun mhaka vhôdd sontôs bhòglo ani ghottai mell'li; amchea bhavam-bhoinninchim-i kallzam tunvem, mhojea bhava, somadhan keleãi.

8. Hea pasot, Krista sovem dhir gheun, mhojean tuka tuzo kaido pallunk hukum ghalunk zatalem;

9. tôri tujêa mogak ulo marunk ani tuka vinoti korunk fuddem sortam: hanv Paulu, mhatarê piraiek pavlolo ani tea-vôn odik atam Jezu Krista khatir bondkhonnint poddlolo, tuka hi vinoti kortam.

10. Bondkhonnint astana hanvem zolm dil'lea mhojea puta Onesimusa pasot êk upkar magtam.

11. Eka vellar to tuka faideacho zalona; punn atam, mhaka faideak poddlo toso, tuka-i to faideacho zatolo.

12. Hanv taka tujê-xim portun dhaddtam; taka dhaddun, êkê bhaxen, mhojem kallizuch dhaddtam.

13. Xubhvôrtomana khatir hanv bondkhonnint astana tum khuxen mhaka adar ditolo asloi, toch adar mhaka diunk taka hanga mhojê-xim dovrunk mhoji khuxi asli.

14. Punn tuji maniotai nastana kitench korunk mhaka borem dislem na; tuzo upkar tujê ap-khuxecho zauncho ani tuka boll korun hanvem to kann gheuncho nhoi mhonn mhaka dislem.

15. Onesimusak ghoddiê tujê sorxilo thoddo vêll heach pasot kaddlolo zait ki to dusrim tujea sangata sodankal ascho,

16. punn atam gulam' koso nhoi, tôr gulama poros odik vorto, êk opurbaiecho bhav koso: mhakach tachi itli opurbai zalear, tuzoch gulam' koso ani Somia sovem êk bhav koso to tuka kitlo odik opurbaiecho zauncho na?

17. Tôr amchê modem asa tea ekcharak tum mol ditai zalear, mhaka tumger moipasan ghetoloi asloi, teach moipasan taka-i ghe.

18. Tannem zôr tuka koslem nuksann haddlam vô to tuka kitem dennem asa zalear, tem mhojea hixeobak lai.

19. Hanv, Paulu, mhojeach hatan hem boroun ditam: hanv farik kortolom.Tuka hanvem tujea rinnachougddas korchi goroz na: mhojê kodde tuka asa tem rinn mhollear mhojê vorvim tuka mell'llam tem bhavarthachem jivit.

20. Tôr, mhojea bhava, Somia khatir tujer patieun ravtam. Krista sovem mhozo jiv somadhan kôr.

21. Hem boroitana hanv magtam tem tum kortoloi mhonn mhaka khatri asa; khorem mhollear, tea-vôn chodd kortoloi mhonn hanv borem zannom.

22. Teach borabôr anink êk upkar magtam: mhaka-i ravunk ilo zago dixi? kiteak tumam-soglleanchim magnnim aikun, Dev mhaka tumchê-xim portun pavoitolo mhonn mhaka visvas asa.

23. Epafras Jezu Krista khatir mhojê borabôr bondkhonnint asa: to tuka noman korta.

24. Têch bhaxen mhoje sohokari Marku, Aristark, Demas ani Luk tuka noman kortat.

25. Somia Jezu Kristachi doiallai tumam-somestank bhôgunk mellum.