1. Judas, Jezu Kristacho chakôr ani Jakobacho bhav, Devan apoil'lea somestank hem potr boroita. Deva amchea Bapachim tumi opurbaiechim bhurgim ani Jezu Kristachea asrea khal tumi surokxit asat.
2. Devachi doiallai tumi odik-odik bhôgunk pavum, tumchem jivit sodam xanti-somadhanan cholum ani tumchê modem pritimôg subhamponnim vaddot vochum: he mhoje otrek.
3. Mhojea pritichea bhavam-bhoinnimnô, amam-somestanchea taronna vixim hanv tumkam borounk axen otrektalom; punn hea vellar tumkam hanvem borounchi vhôdd goroz asa mhonn mhaka dislem; ani ti mhollear Devachea sogllea bhoktank dil'lea bhavartha pasot tumi dhiran zhuzchem mhonn tumkam ulo marunk.
4. Tumchê modem kãi zannam guptim ghusleant; magam thaun oslea devdhorm naslolea mon'xancher khastichem formonn poddlolem asa; amchea Devachi doiallai sôddun tim kamcharachi vatt dhôrtat, ani Jezu Krist amcho ekloch Dhoni ani Somi mhonn tim manun ghenant.
5. Sorvesporan Aplê porjek Ejiptantli soddoili, punn uprant zãnnim bhavarth dhôrunk na tanchem Tannem nisontton kelem: hem sogllem tumi bês-borim zannont, tori tancho hanv tumkam ugddas kortam.
6. Devdutancho-i ugddas kortam: tankam vhôdd odhikar dil'lo aslo, punn to tãnnim samballunk na, ani aplem tthikann sôddun dilem; Vhoddlea Disachê Zhôddtek Devan tankam kallokhachea konddant sasnnak sankllimnim bandun dovorleat.
7. Têch bhaxen, Sodomacho, Gomorracho ani bhonvtonnchea nograncho lôk pozoddponnant lollon aslo ani soimbacher add xindoll patkam kori, dekhun tankam sasnnachea ujeachi khast poddli: hea lokachi khast amkam soglleank êk xiddkavnni.
8. Hanv tumkam sangtalom tim devdhorm naslolim mon'xam toxench kortat: apnnankuch ani dusreank-ui fosovpachim sopnam tanchim. Oslim sopnam gheun tim apleô kuddi bhoxttaitat, Devachea odhikarachi beporva kortat ani mhoimevont devdutank opmantat.
9. Mikael mha-devdutan porian oxem korunk na: Moizesachê kuddi vixim devchara kodde vad-vivad kortana, Mikael opmanachea utramnim tacher khastichem formonn marunk fuddem sorunk na; tannem fokot oxem mhollem: "Sorvespor tujer khastichem formonn marum."
10. Punn him mon'xam zalear apunn somzonant tea vostunchi ninda kortat; thoddeô vostu tim somzotat khorem, punn fokot soimbachea gunnan, ginean-naslolea mon'zatim bhaxen, punn heô-i tancho nas korun uddoitoleô.
11. Tanchem kotta! Tãnnim Kainachi vatt dhôrli; Balaaman kel'lem toxem, duddvachê axek lagun tim tachêch chukik sampoddlim; Kora bhaxen tim kolpolim ani tachêch bhaxen tanchem nisontton zata.
12. Tumchê sobhechea jevnnank tim êk kanttallo: loz nastana pottbhôr jevtat ani apnnanchoch poramôs kortat. Varem oddun vhorta toslim udok naslolim kupam tim; Shorod kallar porian follam dinant toslim zhaddam tim; pallam soit umttun kaddlolim ani sarkinch mel'lim zhaddam tim.
13. Tim dorianchim unchamboll zal'lim lharam, ani tancho fenno mhollear tanchinch lojechim kortubam. Mollbar zollim-mollim firtolea noketram porim him mon'xam: sasnnak kallkha-giddachem kondd tankam nirmil'lem asa.
14. Adanva pattlo satvo mull-purux Enok, hannem tanchê vixim adim fuddem oxem bhakit korun dovorlam: "Ho polleiat, hozaranche hozar aplea povitr dutank gheun Sorvespor ieta. Soglleanchi mon'subi korunk ani devdhorm nasloleancher tanchea odhormi kortubam pasot ani tãnnim Devachi ninda kel'lea pasot khastichem formonn marunk To ieta.
16. Him mon'xam sodanch gunngunnit asat ani dusreancher guneanv thaptat; tim apleanch vaitt vondovnniam pormannem choltat; tim apnnanchich boddai sangtat, apleach adavak dusreank fulam malltat.
17. Punn, mhojea mogachea bhavam-bhoinnimnô, amchea Somia Jezu Kristachea dhormdutamnim tumkam adim-fuddench sangun dovorlam tacho ugddas korat.
18. Tãnnim tumkam oxem sanglam: "Nimannea disamnim aplea khottea vondovnniam pormannem choltat toslim mon'xam dixtti poddtolim ani tim tumcheô moskoriô kortolim."
19. Tinch tim tumchê modem futti ghaltat tim, soimba pormannem choltat tim; tankam Povitr Atmo na.
20. Punn tumi, mhojea pritichea bhavam-bhoinnimnô, tumchea bhov povitr bhavarthacher tumchem jivit bandun haddat ani Povitr Atmeachea preronnan prarthon korat.
21. Devachea mogant thir ravat, ani amcho Somi Jezu Krist Aplê kaklutin ditolo tea Sasnnik Jivitachi vatt polleit ravat.
22. Zancho bhavarth donvddollta, tankam doien somzun gheiat;
23. tankam ujeantlim nivarunk vavrat. Herank chotrai gheun kaklut dakhoiat; tanchea patki jivitacho voso lagla tea angleachi porian vitt dhôrat.
24. Atam amchea ekleach Devak ani Tarokak vakhannum-ia! Tumchea bhavarthantlim tumi koddsorona zaunk tumkam samballunk Taka podvi asa; toxench Aplea mhoimevont mukhamolla mukhar tumkam niropradhi korun ani sontosan bhôrun haddunk Taka tank asa.
25. Amchea Somia Jezu Krista udexim hea ekleach Devak mhoima, thorponn, odhikar ani podvi asa kallam-iugam adim thaun, toxench atam-i ani sodam sorvodam. Amen.
